Кентау қаласының тұрғыны Алтынай Картабаева өзінің бастамашылдығы мен еңбекқорлығының арқасында «Массаж кабинетін ашу» жобасын сәтті жүзеге асырып, мемлекеттік грант иегері атанды. Алған грант қаражатына массажға қажетті құрал-жабдықтарды сатып алған кәсіпкер қала тұрғындарына сапалы қызмет көрсетуге кірісті. Атап айтқанда, массаж үстелі, жиналмалы орындық, тізе орындығы мен фитобочка және денеге массаж жасайтын аппараттарын алған. Бұл құралдар оның жұмыс көлемін айтарлықтай ұлғайтып, клиенттерге қызмет көрсетуді оңтайландырған, деп хабарлайды Todayinfo ақпараттық агенттігі.
Алтынайдың массаж жасауға деген қызығушылығы перзентінің жағдайына байланысты туындаған. Ұлының 1-топтағы ерекше бала екенін ескере отырып, анасы ұлының денсаулығына қажетті массажды өзі үйрену жолын таңдаған. Ұлының денсаулығына ерекше күтім қажет болғандықтан, Алтынай Үрімжі қаласына барып, нүктелі массаждың қыр-сырын үйреніп қайтқан. Осы сапары оның өмірін өзгертетін шешім қабылдауына себеп болады. Ұлына үнемі күтім қажет болғандықтан массажды кәсіби түрде үйреніп алу ана үшін дұрыс қадам болды.
Өмір сынағына сынбаған ана керсінше бала үшін мықты болуды үйреніп осы саланы жетік меңгеруді қолға алады. Астана, Алматы және Шымкент қалаларында арнайы курстардан өтіп, массаждың әртүрлі техникасын меңгеріпті. Оның ішінде бал массажы, от массажы, емдеу, гигиеналық, классикалық, косметикалық және спорттық массаж түрлері бар. Ол өз біліктілігін арттыру арқылы кәсіби маманға айналады. Жұмысында алған тәжірибесі мен білімі оны халық арасында танымал етіп, массаж кабинетіне ем алушылар көптеп бас сұға бастапты.
Алтынайдың жұмысы өз ортасында тек кәсіби қызмет қана емес, сонымен бірге халық үшін шынайы көмек көзіне айналған. Емделушілердің ішінде өз ауруларынан айығып, ризашылық білдіргендер де аз емес. Тіпті тұрақты клиенттер арасында оның жұмысын жоғары бағалап, оны шебер маман ретінде мойындағандар көп.
«Мен емді алғаш рет қабылдап отырмын. Ем нәтижесі қуантарлық. Дәрігердің кәсіби шеберлігі сенімімді арттырды, әрі жағдайым әлдеқайда жақсарғанын сезініп, қуанып жүрмін»,- дейді Айгүл есімді ем алушы.
Алтынай Картабаева қазіргі таңда бірнеше шәкірт тәрбиелеп, массаж жасау шеберлігін өз білгенімен бөлісе бастапты. Алтынай өз ісіне тек табыс көзі ретінде қарамай, оған аса үлкен жауапкершілікпен мән береді. Өз клиенттерінің денсаулығына, жайлылығына назар аудара отырып әрбір адамның ерекше бақылауда болуын да жіті қадағалап отырады екен.
«Менің жұмысым – науқастардың денсаулығын жақсартуға үлес қосу. Әр адамның қажеттілігін ескеріп, жеке тәсіл қолдануға тырысамын. Массаж барысында басты назарды бұлшықеттердің кернеуін босатуға және қан айналымын жақсартуға қоямын. Адамдардың жағдайының жақсарғанын көрген сайын өз жұмысымның маңызды екенін түсінемін. Әр пациенттің қайта келіп, алғыс білдіруі мені одан әрі қанаттандырады. Мен де бұл салаға өмірдің сынағы арқылы келіп отырмын. Бауыр еті баламның денсаулығы қатты алаңдатты. Қиналдық, жүгірдік, қаншама аурухананың есігін тоздырдық. Перзент кез-келген ата-ананың жүректегі ең нәзік қантамыры секілді ғой. Перзент қандай күй кешсе ана да дәл сол күйді жан дүниесінен өткізеді. Ем алуға келген әрбір науқастың жай-күйі маған таныс. Барынша физикалық еммен қатар психологиялық көмек көрсетуге де тырысып бағамын. Тұрақты ем бәрін де жеңіп шығуға көмек береді»,- дейді шағын кәсібін ашқан Алтынай Картабаева.
Массаж кабинетін ашып, өз ісін дөңгелетіп отырған ана жобаларды жүзеге асыруға қолдау білдірген мемлекеттік қолдауларға да өз алғысын білдірді.
«Мемлекеттің қолдауы арқылы жеткен табыс әрі қарайғы еңбекқорлықты, табандылық пен кәсіпке деген сүйіспеншілікті дәлелдейді. Әрине, мемлекеттен қолдау алу үлкен мүмкіндік, бірақ оны сәтті жүзеге асыру үшін қажырлы еңбек қажет. Мемлекеттік гранттың қолдауымен өз массаж кабинетімді ашу арманым жүзеге асты. Кәсіпкерлікті бастау оңай емес, бірақ грант арқылы қажетті жабдықтар сатып алып, кәсіби жұмысты жолға қойдым. Менің мақсатым – адамдардың денсаулығын жақсартып, өзімнің туған қаламда сапалы массаж қызметін ұсыну. Мемлекеттік қолдаудың арқасында жаңа деңгейге көтеріліп, болашақта қызмет түрлерін кеңейтуді жоспарлап отырмын», -дейді Алтынай Картабаева.
Алтынайдың өмір жолы, оның ана болудағы жауапкершілігі мен кәсібіне деген адалдығы бір-бірімен тығыз байланысып жатыр. Ол ұлының денсаулығы үшін массаж үйрену қажеттілігін түсініп, оны өз кәсібіне айналдыру арқылы көптеген адамдарға көмектесіп отыр. Бұл оның өміріндегі қиындықтарды жеңу жолындағы шешімдерінің қаншалықты маңыздылығын дәлелдейді.
«Оның жұмысқа деген адалдығы мен кәсібилігі оны тек жақсы маман ғана емес, сондай-ақ қамқор ана және қоғамға пайдалы азамат ретінде танымал етті»,-дейді Хадиша есімді ем алушы әже.
