Әйелді өлтіріп, оның қыздарын ұрламақ болған әскери қызметкер қамауға алынды

Ресейдің Курск гарнизонының әскери соты бұрын зорлау бойынша сотталған Дмитрий Стенькинді қамауға алды. Ол шекара маңындағы Гирьи ауылында 41 жастағы Олеся Ларинаны атып өлтіріп, оның екі қызын ұрлауға әрекет жасады деген күдікке ілінген. Бұл туралы Todayinfo ақпарат агенттігі хабарлайды. Куәгерлердің айтуынша, 30 сәуірге қараған түні әскери қызметкер жеке тұрғын үйге басып кіріп, оқ жаудырған. Оқиға салдарынан әйел қаза тауып, күйеуі Игорь ауыр жарақат алған. Алдын ала болжам бойынша, күдікті 10 және 6 жастағы екі қызды ұрламақ болған.

 «Пепел Курск» басылымының хабарлауынша, Дмитрий Стенькин – Астрахань қаласының тұрғыны, бірнеше рет қылмыстық жауапкершілікке тартылған. Оның ішінде кәмелетке толмаған қызды зорлау ісі де бар. 2024 жылы колонияда жазасын өтеп жатқан кезде ол Ресей Қорғаныс министрлігімен келісімшартқа отырып, әскери қызметке қайта алынған.

Құқық қорғау органдары оқиғаның барлық мән-жайын анықтап жатыр. Қазіргі уақытта Стенькин қамауға алынды, оған адам өлтіру, балаларды ұрлау әрекеті және қару қолдану баптары бойынша іс қозғалды.