Қазақстан мен БҰҰ-ның Азық-түлік және ауыл шаруашылығы ұйымы (ФАО) аграрлық саладағы ынтымақтастықты жаңа деңгейге көтереді. Тараптар технологияларды енгізуге, тұрақты дамуға және азық-түлік қауіпсіздігін арттыруға басымдық береді, деп хабарлайды Todayinfo ақпарат агенттігі.
Ауыл шаруашылығы министрі Айдарбек Сапаров ФАО бас директорының орынбасары Виорел Гуцумен кездесу өткізді. Кездесу барысында тараптар серіктестік бағдарламасының ағымдағы жай-күйін, бірлескен жобаларды дайындау мен келісуді, сондай-ақ одан әрі өзара іс-қимыл перспективаларын талқылады.
«Сарапшылар топтарының үйлесімді жұмысының арқасында біз негізгі құжаттарды дайындаудың соңғы сатысына шықтық. Әрбір жоба халықаралық стандарттар мен Қазақстанның АӨК дамытудың ұлттық басымдықтарына сәйкес келуі маңызды. Бұл бастамалар ауыл шаруашылығын технологиялық жаңартуға күшті серпін береді деп сенемін», — деді Сапаров.
Серіктестік бағдарламасы аясында бірқатар стратегиялық жобаларға ерекше назар аударылады. Атап айтқанда, «Қазақстандық сорттар мен тұқымдар» ұлттық бастамасы бойынша Ақмола, Алматы, Қостанай және Солтүстік Қазақстан облыстарында деректер жинау аяқталды. Топырақ органикалық көміртегін мониторингтеу, бағалау және верификациялаудың ұлттық жүйесін әзірлеу жобасы 2026–2029 жылдарға есептелген. Шегірткені бақылау мен болжауды жетілдіру жобасында цифрлық технологиялар, жасанды интеллект және ұшқышсыз ұшу аппараттары қолданылады.
Жалпы, АШМ мен ФАО шамамен 9,5 млн долларға 10 негізгі жобаны іске асыруда.
