АҚШ генералы Мадуроны ұстау операциясы қалай өткенін айтып берді

Америка Құрама Штаттарының Қарулы Күштері Бас штаб бастықтарының біріккен комитеті төрағасы генерал Дэн Кейн Николас Мадуроның қолға түсуі бойынша әскери операцияның егжей-тегжейін алғаш рет жария етті. Оның айтуынша, Венесуэла басшысын ұстау операциясын әзірлеу бірнеше айға созылған. Бұл кезеңде барлау деректері жиналып, бақылау жүргізіліп, арнайы жасақтар жаттығу өткізіп, өзара әрекеттестікті пысықтаған. Бұл туралы Todayinfo.kz ақпарат агенттігі ВВС-ге сілтеме жасап хабарлайды. Генерал Кейннің сөзінше, желтоқсанда ауа райының қолайсыздығына байланысты операция біраз уақытқа кейін шегерілген. Тек 3 қаңтарға қараған түні ауа райы қолайлы қалыпқа келгенде, сағат 22:46-да АҚШ президенті Дональд Трамп операцияны бастауға бұйрық берген. АҚШ-тың 20-дан астам әскери базасынан бір мезетте 150-ден аса әскери ұшақ пен пилотсыз аппарат әуеге көтерілген. Одан кейін Кариб теңізіндегі әуе тасымалдағыштан тікұшақтар ұшып шығып, шабуыл тобы Мадуроның резиденциясына бет алған. Шабуыл тобының құрамында АҚШ Әділет министрлігінің өкілдері де болған – олардың міндеті Мадуроға ресми айып тағу еді.

Мадуро қалай қолға түсті – операция барысы

Тікұшақтар су бетіне бар болғаны 30 метр биіктікте ұшқан. Бұл сәтте америкалық авиация мен дрондар Венесуэла әуе қорғанысын нысанаға алып, қорғаныс қабілетін әлсіреткен. Каракас уақытымен 02:01-де тікұшақтар Мадуро резиденциясына жеткен. Әуеден қорғау жұмыстары үзіліссіз жалғасып тұрған. Жерден атылған оқ тікұшақтардың біріне тиген, алайда генералдың айтуынша, ол жарамсыз болып қалмай, операцияны сәтті аяқтап, басқа тікұшақтармен бірге кері қайтқан. Нәтижесінде Николас Мадуро мен әйелі Силия тұтқынға алынып, тікұшақтар қайтадан көтеріліп, таңғы 3:29-да «Иводзима» авиа тасымалдағышына қонған. Барлық операция 4 сағат 43 минутқа созылған.

Операция әлі де құпия күйінде

Генерал Кейн кейбір мәліметтерді әдейі ашық айтпауға тырысқанын атап өтті. Себебі мұндай әрекеттердің нақты әдіс-тәсілдері мен тактикалары болжанбауы керек деп түсіндірді. Сонымен қатар, ол бұл операцияға түрлі әскери салалар – авиация, теңіз күштері, ғарыштық бөлімдер, теңіз жаяу әскері — жұмылдырылғанын айтып, мұндай ауқымды әрекетті тек АҚШ Қарулы Күштері ғана іске асыра алатынын мәлім етті.