Астанада түнгі уақытта ойын-сауық орнының маңында 18 жастағы жігіт қаза тапқаны туралы ақпарат әлеуметтік желілерде тарады. Оқиғаға куә болғандар марқұмның пышақ жарақатын алғанын айтады.
Бұл туралы Todayinfo порталы хабарлайды.
Куәгерлердің сөзінше, жұма мен сенбіге қараған түні елордадағы көңіл көтеру орындарының бірінде Семейден келген 18 жастағы жігіт пышақ жарақатынан көз жұмған.
Оқиға болған төңіректе полиция қызметкерлері көптеп жиналғаны, ал клубқа келген адамдардың эвакуацияланғаны да жазылады.
Полиция не дейді?
Жергілікті БАҚ өкілдері Астана қалалық полиция департаментіне ресми сұрау салған. Қазіргі таңда оқиғаға қатысты нақты мән-жайлар мен күдіктінің/күдіктілердің бар-жоғы туралы ресми ақпарат күтіліп отыр.
Елорда тұрғындары мен қала қонақтары түнгі уақытта ойын-сауық орындары маңында қауіпсіздікке көбірек мән беруге шақырылады.
Елордадағы қылмыс статистикасы және алаңдаушылық
Еске салайық, биылғы жылдың 11 айында Астанада Қылмыстық кодекстің 99-бабы («Адам өлтіру») бойынша 121 сотқа дейінгі тергеп-тексеру басталғаны айтылған.
Желтоқсан айының басында Ішкі істер министрінің орынбасары Астанадағы ахуалды «ерекше алаңдататын» деп бағалап, қылмыстардың басым бөлігі түнде және таңға жуық уақытта, әсіресе ойын-сауық орындарында жасалатынын атап өткен.
Мысал ретінде, 8 қарашада елордадағы «Мята» клубында бір азаматтың қаза тапқаны, ал 29 қарашада «Зима» галереясында ауыр дене жарақатынан тағы бір ер адам көз жұмғаны келтіріледі.
