Түркістан облысында сейф ұрлығы бейнекамераға түсіп, полиция қылмысты тез арада ашты. Күдіктілердің бірін Астанадан іздеп табуға тура келді, деп хабарлайды Todayinfo ақпарат агенттігі облыстық полиция департаментінің баспасөз қызметіне сілтеме жасап.
Оқиға Кентау қаласында болған. Іс материалдары бойынша, екі ер адам кешкі уақытта жеке үйдің ауласына кіріп, пластик терезені ашып, сейфті алып шыққан. Жәбірленушінің айтуынша, сейфте 300 доллар және шамамен төрт миллион теңге тұратын алтын бұйымдар болған.
«Жедел-іздестіру іс-шаралары кешені жүргізілді, оның ішінде бейнебақылау камераларының жазбалары зерттелді. Күдіктілердің жеке басы бір тәулік ішінде анықталды. Олардың бірі Шымкенттегі жалдамалы пәтерде ұсталса, екіншісі Астанадан табылып, полиция бөліміне жеткізілді. Сотқа дейінгі тергеу жүргізілуде», — деп хабарлады облыстық полиция департаменті.
Полиция мәліметінше, күдіктілер кінәсін мойындап, зергерлік бұйымдарды ломбардқа өткізгенін айтқан. Қазіргі уақытта екеуі де қамауда.
