Индербор кентінде «АралТұз» АҚ мен «АралСода» ЖШС жобаларына қатысты өткен қоғамдық тыңдау қатысушыларды екіге бөлді, деп хабарлайды Todayinfo ақпарат агенттігі. Тұрғындар бірнеше жылдан бері жауапсыз қалып келе жатқан сауалдарға нақты жауап беруді талап етті.
Мәдениет үйіне 300-ден астам адам жиналды. Талқылау басынан-ақ залдағы дауыс, шапалақ және сөйлеушілердің сөзін бөлу әрекеттерімен өршіді. Тыңдау Индер көлінен ас тұзын ашық әдіспен өндіруге экологиялық рұқсат алу мақсатында өткізілді.
«АралТұз» компаниясы 10 мың гектар аумақта өнеркәсіптік тұз өндіруді жоспарлап отыр. 2026-2037 жылдар аралығында жыл сайын 37 мың тоннаға дейін тұз өндіру көзделген. Компания шамамен 500 жұмыс орнын ашатынын мәлімдеді. Алайда, есептеулер бойынша, атмосфераға шығарылатын зиянды заттардың көлемі жылына 136 тоннаға жетуі мүмкін.
«Біз санитарлық-қорғау аймағын 500 метр деп белгіледік. Кентке дейінгі қашықтықты ескерсек, қауіп жоқ. Шығарындылар мен топырақтың жай-күйін бақылау үшін тұрақты мониторинг жүргізіледі», — деді тәуелсіз эколог Дәулет Асанов.
Жиынға қатысушылар Индер көлінің мәртебесін өзгерту мәселесін де талқылады. Бұрын көл ерекше қорғалатын аумақтар қатарында болғанымен, 2024 жылдың қарашасында бұл тізімнен шығарылған. Белсенді Есенбай Нұровтың айтуынша, бұл бастаманы Атырау облысының әкімдігі көтерген, ал лицензиялар қоғамдық талқылаусыз берілген.
Талқылау кезінде пікірлер екіге жарылды. Тұрғындардың бір бөлігі жұмыс орындарына үміт артып, жобаны қолдаса, екінші тарап оған үзілді-кесілді қарсы шықты. Белсенділер «Көлден қолдарыңды тартыңдар!» деген жазуы бар плакатты жайып жібергенде, залдағы жағдай ушыға түсті.
«Көлге жанар-жағармаймен жүретін техниканы кіргізуге болмайды. Тұз ауаға көтеріліп, кентке жетеді. Мен мүлдем қарсымын. Бізде онсыз да Қазақстанның жартысын тұзбен қамтамасыз ететін „Индертұз“ бар, тапшылық жоқ», — деді ауданның бұрынғы экологы Марат Мұқанов.
