Белгілі саясаткер Дулат Бакшиев қоғамның дамуына кедергі болып отырған негізгі факторды атады. Оның ойынша, елдің өркендеуі үшін экономикалық байлықтан гөрі саяси еркіндік әлдеқайда маңызды, деп хабарлайды Todayinfo ақпарат агенттігі.
Бакшиевтің пайымдауынша, азаматтардың еркіндігі – кез келген халықты қанаттандыратын басты күш. Ал бостандық шектелген жерде елдің еңсесі түсіп, тұтас қоғам ауқымды дағдарысқа ұшырайды.
"Еркіндік адам мен халықты қанаттандырады. Ал оның жоқтығы адамның еңсесін түсіріп, тұтас бір елді ауқымды күйзеліс пен дағдарысқа апарады. "Мұнай ақшасының" мұндайда пайдасы шамалы", - деп жазды саясаткер.
Ол өз сөзін дәлелдеу үшін Оңтүстік Кореяның тәжірибесін мысалға келтірді. Оның айтуынша, бұл елдің қарқынды дамуы КСРО-дағы Михаил Горбачевтің "қайта құру" саясатымен тұспа-тұс келген.
Сол кезеңде алып көршісінің "еркіндікке бет бұруы" Кореяға саяси реформаларды батыл жүргізуге мүмкіндік берді. Ғаламдану үдерісі де оң ықпалын тигізгенімен, Бакшиев негізгі себеп – бостандық пен заң үстемдігі болғанын алға тартады.
"Заңның билігі", яғни заң алдында барлық азамат тең бола бастады. Құқығыңыз сақталса, оны әділ сотта қорғай алсаңыз "мұртты балта шаппайды" емес пе?! Нағыз ғанибет деген, міне, осы!" - дейді ол.
Сөзінің соңында Дулат Бакшиев Қазақстанның дамуына кедергі болып отырған негізгі факторға тоқталды. Оның пікірінше, мәселе үлкен көршіміз – Ресейдің саяси бағытында жатыр.
"Бізге кедергі болып отырған ең маңызды фактор да сол: үлкен көрші еркіндік емес, қарама-қарсы бағытқа бет бұрғалы 20 жылдай өтті. Бағытын әлі өзгертер емес", - деп түйіндеді Дулат Бакшиев.
Фото: Әлеуметтік желіден
