Елеусінов Әлімханұлының допинг дауына пікір айтты: «Тамағына бірдеңе қосуы мүмкін»

Олимпиада чемпионы, кәсіпқой бокста IBO белбеуінің иегері Данияр Елеусінов орта салмақтағы әлем чемпионы Жәнібек Әлімханұлының допинг сынамасына байланысты ойын айтты, деп хабарлайды Todayinfo ақпарат агенттігі. Елеусіновтің сөзінше, мұндай жағдай әртүрлі себептен тууы мүмкін. Ол команданың ішкі тәртібі әлсіреп кетуі ықтимал екенін де, қарсы жақтың арандатуы да жоққа шығарылмайтынын да меңзеді.

"Мен қасында болған жоқпын, сондықтан нақты не болғанын айта алмаймын. Өзім де допинг бақылаудан өткенмін. Әдетте тексеру келісімшартқа байланысты жүреді: біреуде тек жекпе-жек алдында ғана болады, ал Жәнібекті оқу-жаттығу жиыны кезінде де тексерген. Оның айтуынша, алғашқы бақылау таза болған, ал екіншісінде қандай да бір қалдықтар шыққан.

Мельдоний – көбіне ТМД елдеріндегі спортшылар жиі қолданатын дәрі. Жақын жүретін жігіттермен сөйлестім, Жәнібек ештеңе ішкен жоқпын дейді. Әрине, кез келген адам солай айтады. Бірақ мен оны кінәлай алмаймын: мен үшін әзірге ештеңе дәлелденген жоқ, өйткені Жәнібек бөтен жерде жүр", - деді Данияр Елеусінов.

Олимпиада чемпионы спортшы шетелде жүргенде ұсақ-түйек пен тұрмыстық қауіптің өзі үлкен мәселеге айналатынын айтты. Жауапкершілік тек рингте емес, күнделікті тірлікте де күшейеді.

"Біреу әдейі бірдеңе қосып жіберуі де мүмкін. Сондықтан тамаққа қатты мән беру керек, өз тамағыңды ғана жеу қажет. Тіпті қонақүйдің мейрамханасына да бармаған дұрыс", - деді Елеусінов.