Назарбаев университетінің профессоры Гүлнұр Қалимолдина – зертханалық жобасын DeepTech-стартап деңгейіне шығара алған еліміздегі бірінші ғалымдардың бірі. Оның айтуынша, ғылымнан бизнеске өтудің жолы ешқашан жеңіл болмағанымен, табандылық пен жүйелі жұмыс нақты нәтижеге жеткізеді, деп хабарлайды Todayinfo.kz ақпарат агенттігі.
Ол бірнеше ғылыми жобалардың жетекшісі болумен қатар, Mirai Tech атты коммерциялық компаниясын дамытып келеді. Бұл команда ғылымда жасалған технологияларды нарыққа енгізуді мақсат етеді. Қазіргі таңда олар отандық зерттеу негізінде жасалған инновациялық өнімді Қазақстаннан тыс жерге де шығарып жатыр. Ғалымның стартапы президент Қасым-Жомарт Тоқаевтың премиясында «Ең үздік ғылыми жасанды интеллект жобасы» деп танылып, назар аудартты.
Инновацияның басты жемісі – ұлтарақ түрінде әзірленген сенсорлық құрылғы. Бұл құрылғы қозғалыс динамикасын толық оқып, талдау жасайды. Технология спортта да, медицинада да қолданылады: реабилитацияға, диагностикаға көмектеседі, ал кәсіби спортшыларға жарақатты алдын ала болжауға мүмкіндік береді. Дүниежүзінде алғаш рет жасалған наноұлтарақ Қазақстан клубтарында пайдаланылып, клиникаларда сәтті апробациядан өтті. Бірнеше спорт ұйымымен келісімдер жасалып, жоба алғашқы $90 мың инвестициясын тартқан.
Гүлнұрдың айтуынша, қазір жас ғалымдарды қолдау бұрынғыдан әлдеқайда жүйелі. Президент Қасым-Жомарт Тоқаев жастардың ғылымға келуін стратегиялық міндет деп атап, бірқатар бағдарламаларды іске қосты: «Жас ғалым» гранттары кеңейтілді, постдокторантураны қолдау тетіктері күшейтілді, перспективалы зерттеулерге арналған ұлттық ғылыми жобалар саны артты. Сонымен қатар Президент тапсырмасымен ғылыми инфрақұрылымды жаңғырту, зертханаларды заманауи жабдықтармен қамтамасыз ету, ғылымды коммерцияландыруға арналған арнайы қор құру бағыттары дамып жатыр. Бұл шаралар жас зерттеушілерге тек ғылыми нәтиже емес, нақты өнім жасауға да мүмкіндік береді.
Гүлнұрдың пікірінше, ғылым саласының келешегі осы тұрақты қолдауға тікелей байланысты. Өйткені ірі жобаны жүзеге асыру үшін уақыт пен қаржыландыру ғана емес, әлемдік деңгейдегі зерттеу ортасына қолжетімділік керек. Қазақстанда бұл бағыт енді қарқын алып келеді, ал терең технологиялық стартаптар үшін нарықта үлкен мүмкіндіктер бар.
