Шымкентте құмар ойын бизнесін заңсыз ұйымдастырған қылмыстық топтың әрекетіне тыйым салынды, деп хабарлайды Todayinfo Қаржылық мониторинг агенттігіне (ҚМА) сілтеме жасап.
Тергеу мәліметінше, шымкенттік бір тұрғын «Техас холдемі» деген мобильді қосымша арқылы жұмыс істейтін жасырын интернет-казиноны үйлестірген. Ол «Vendetta» және «AMG600L» ойын клубтарын құрып, оларды «Nomad» желісіне біріктірген.
Клубтар тәулік бойы жұмыс істеп, ойыншыларды тек Қазақстаннан ғана емес, көршілес Өзбекстан мен Қырғызстаннан да тартқан. Аудиторияны кеңейту үшін мессенджерлер мен жіберілімдер қолданылып, бонустық жүйе енгізілген. Ойыншылар банктік аударымдар арқылы шоттарын толтырып, «фишкалар» алып, ұтыс кезінде ақшаны карталарына аудартқан.
Ұйымдастырушылар әр ойын үстелінен 3-5% комиссия («рейк») алып, тұрақты пайда тапқан. Ойыншыларды ұстап қалу үшін виртуалды қарыздар да берілген. Қаржы ағындарын жасыру мақсатында шетелдік азаматтардың «дроппер» шоттары пайдаланылып, оларға 100-200 мың теңге сыйақы төленген. Барлық шоттар бойынша айналым 557 млн теңгеден асқан.
Ұйымдастырушының тұрғылықты жерін тінту кезінде есірткі заттары да табылып, алынған. Екі күдіктіге қатысты үй қамауы бұлтартпау шарасы таңдалып, қылмыстық іс сотқа жіберілген. ҚМА мәліметінше, құмар ойынға қатысушылар 30 млн теңгеге дейін шығынға ұшыраған.
