Премьер-министр Олжас Бектенов Еуропа, Канада және АҚШ-тың жетекші ауылшаруашылық машина жасау компанияларының басшыларымен кездесу өткізді. Кездесу барысында өндіріс көлемін ұлғайту, өнімділікті арттыру және экспорттық жеткізілімдерді кеңейту аграрийлердің техникалық жарақтануына жаңа талаптар қойып отырғаны айтылды.
Қазіргі уақытта Қазақстан егістіктерінде 130 мыңнан астам трактор, 30 мыңға жуық комбайн және 200 мыңнан астам тіркеме және аспалы техника пайдаланылады. Өткен жылы техника паркінің жаңару деңгейі 6,5% құрады, ал жыл сайынғы мақсатты көрсеткіш 10% деңгейінде белгіленген. Сұранысты ынталандыру үшін техника сатып алу шығындарының 30% дейін субсидиялау, отандық өнім үшін 5% жеңілдікпен қаржыландыру, сондай-ақ несие және лизинг жүктемесін азайту шаралары қолданылады.
Қабылданған шаралар нәтижесінде соңғы екі жылда отандық техниканы өткізу көлемі 35% өсіп, 7,7 мың бірліктен 10,4 мың бірлікке жетті. Елде жылына 8 мыңнан астам трактор және 1,2 мың комбайн шығаратын 8 ірі кәсіпорын жұмыс істейді, ал отандық техниканың ішкі нарықтағы үлесі 90% құрады.
Халықаралық серіктестер жергіліктендіруді тереңдетуге, технологиялар трансферіне және сервистік инфрақұрылымды дамытуға мүдделілік танытты. John Deere компаниясы алдағы жылдары 3 мыңға жуық техника шығаруды жоспарлап, Қазақстанды Орталық Азиядағы негізгі серіктес ретінде қарастырады. Eurasia Group AG мамандарды оқыту және жұмысқа орналастыру бағдарламаларын іске қосатынын мәлімдеді.
Кездесу қорытындысы бойынша «АгромашХолдинг KZ» АҚ, «Eurasia Group AG» ЖШС және Väderstad Group, Kuhn Group сияқты халықаралық өндірушілер арасында көпжақты келісімдерге қол қойылды. Құжаттар Қостанайдағы Локализация орталығының базасында өндірісті жергіліктендіруді көздейді.
