Қырғызстан шекарасындағы ұзын-сонар кезек туралы видеоны Қырғызстанның Шекаралық бақылау бас басқармасының бастығы Мақсат Әбдірахманов түсіндірді, деп хабарлайды Todayinfo ақпарат агенттігі.
Шекарада түсірілген кадрларды Sputnik Kyrgyzstan Telegram арнасы жариялаған. Мақсат Әбдірахманов видеоның биылғы жылдың бірінші мамырында түсірілгенін нақтылады.
"Сол күні қырғызстандық туристік фирмалар клиенттерін Қазақстанға жаппай жібергендіктен, кезек пайда болды. Біз шекара жасақтарын күшейткендіктен, ол 2-3 сағат ішінде тарап кетті. Қазір шекарада ондай жағдай жоқ," — деді ол.
Биыл сәуір айында Қырғыз Республикасы Парламентінің депутаты Табылды Мұратбеков Жоғорку Кеңеш отырысында Қазақстанда қырғызстандықтардың көліктеріне шабуыл жасалғанын мәлімдеген болатын. Депутаттың айтуынша, Қырғызстан азаматтары Қазақстанға турист ретінде келеді, бірақ агрессияға тап болады.
Бұған дейін біз қазақстандықтар үшін Қырғызстанда болу ережелерінде қандай өзгерістер болғанын жазған едік.
