Ешқашан кешірмейді: Президент келер ұрпақтың алдындағы міндетті атады

Қасым-Жомарт Тоқаев әл-Фараби атындағы ҚазҰУ-да ғылыми қоғамдастық өкілдерімен кездесті. Жиын барысында Мемлекет басшысы елдің болашағы білім мен ғылымның дамуымен тікелей байланысты екенін атап өтті. Президенттің айтуынша, келер ұрпақ бүгінгі буынның кейбір кемшіліктеріне түсіністікпен қарауы мүмкін, алайда елді Әділетті әрі Қуатты мемлекетке айналдыру мүмкіндігін жіберіп алғанды кешірмейді.

– Келер ұрпақ біздің кейбір кемшіліктерімізге көз жұма қарайтын шығар. Бірақ олар Қазақстанды Әділетті, Қуатты мемлекетке айналдыратын, заң мен тәртіп, тазалық, табиғатты аялау, білім және ғылым салтанат құратын мүмкіндікті мүлт жібергенімізді ешқашан кешірмейді. Қазақстан осындай ел болуы керек. Біздің түпкі мақсатымыз – осы, – деді Президент.

Кездесу барысында ғылымды дамыту, білім беру сапасын арттыру және ғылыми қауымдастықты қолдау мәселелері талқыланды. Фото: Ақорда