Дүйсенбі, 15 желтоқсанда Қазақстанның басым бөлігінде ауа райы күрт нашарлайды деп күтілуде. Синоптиктердің болжамына сүйенсек, еліміздің бірқатар аймағында боран соғып, жолдарды көктайғақ басады. Бұл туралы Todayinfo порталы жазды.
Мамандардың ескертуінше, бұл циклон әсіресе солтүстік, шығыс және орталық өңірлерге қатты әсер етпек. Ал оңтүстікте жауын-шашын аралас қар жауып, тұман түседі деп болжануда.
Мегаполистерде жағдай қандай?
Ірі қалалардың тұрғындары үшін дүйсенбі оңай басталмайын деп тұр. Әсіресе елордада желдің екпіні қатты болады.
-
Астанада күн бұлтты, қар жауып, боран соғады. Желдің жылдамдығы 30 м/с-қа дейін, тіпті одан да жоғары болуы мүмкін. Бұл – өте қауіпті көрсеткіш. Ауа температурасы түнде де, күндіз де 8-10 градус аязды көрсетеді.
-
Алматыда таңертең және күндіз жаңбыр соңы қарға ұласуы мүмкін. Жолдарда көктайғақ қаупі бар, кей жерлерде тұман түседі. Ауа температурасы -1...+1 градус шамасында болып, кешке қарай суытады.
-
Шымкентте ауа райы құбылмалы: жауын-шашын (жаңбыр, қар), көктайғақ және жаяу бұрқасын күтіледі. Күндіз ауа температурасы 0...+2 градус жылы болады.
Өңірлердегі қауіпті құбылыстар
Синоптиктердің дерегінше, Ақмола, Қостанай, Солтүстік Қазақстан, Павлодар және Қарағанды облыстарында нағыз қысқы дауыл күтіледі. Бұл аймақтарда желдің екпіні секундына 30 метрге дейін жетуі ғажап емес. Көру қашықтығы нашарлап, жолдарда көктайғақ болады.
Батыс өңірлерде (Ақтөбе, Батыс Қазақстан, Атырау, Маңғыстау) қар жауып, жаяу бұрқасын соғады. Атырау мен Маңғыстауда жел күшейіп, түнде аяз сақталады.
Оңтүстік және оңтүстік-шығыс аймақтарда (Жамбыл, Түркістан, Жетісу, Алматы облыстары) жағдай басқаша: мұнда "плюс" пен "минус" арасындағы температура ауытқуы салдарынан жолдар тайғақ болады. Таулы аймақтарда қалың қар жаууы ықтимал.
Шығыс Қазақстан мен Абай облысында да қар, боран және көктайғақ болжанады. Желдің екпіні 23-28 м/с-қа дейін жетеді.
