Жапония үкіметі жыл соңында ірі дипломатиялық қадамға барғалы отыр. Ресми Токио Орталық Азияның бес мемлекетінің басшыларын, оның ішінде Қазақстан Президентін арнайы саммитке шақырды. Кездесу 19-20 желтоқсан күндері Токиода өтеді деп жоспарлануда.
Бұл ақпаратты Жапонияның билеуші Либералды-демократиялық партиясының вице-президенті Таро Асо растады. Партияның "Жапония – Орталық Азия достастығы" депутаттық тобының жиналысында ол алдағы сапардың маңыздылығына тоқталды.
"Кешігуге болмайды": Геосаяси астар
Бұл саммит жай ғана кездесу емес, Жапонияның аймақтағы ықпалын сақтап қалуға ұмтылысы. Таро Асоның айтуынша, соңғы жарты жылда әлемдік державалар Орталық Азияға ерекше назар аударып үлгерген.
«Соңғы алты айда Ресей, Қытай және АҚШ Орталық Азия елдерімен жоғары деңгейдегі келіссөздер өткізді. Жапония үшін де бұл саммитті сәтті өткізу дипломатиялық тұрғыдан өте маңызды», – деп атап өтті Таро Асо.
Расымен де, Қазақстан мен көршілес елдер қазір ірі ойыншылардың "қиылысында" тұр. Жапония бұл бәсекеде технологиялық және инвестициялық әріптес ретінде өз орнын жоғалтқысы келмейді.
Өтпей қалған саммит тарихы
Естеріңізге сала кетейік, бұл тарихи кездесу бастапқыда 2024 жылдың тамыз айында Астанада өтуі тиіс еді. Ол кездегі Жапония премьер-министрі Фумио Кишида Қазақстанға ресми сапармен келуді жоспарлаған болатын.
Алайда, дәл сапар қарсаңында Жапонияның метеорологиялық агенттігі "Нанкай ойпатындағы" аса қуатты жер сілкінісі туралы ескерту жасады. Табиғи апат қаупіне байланысты Кишида сапарын шұғыл тоқтатуға мәжбүр болған еді. Енді, араға уақыт салып, тараптар Токио төрінде бас қоспақшы.
Санаэ Такаичимен жеке кездесулер
Жаңа жоспар бойынша, Жапонияның қазіргі Премьер-министрі Санаэ Такаичи әр мемлекет басшысымен жеке-жеке екіжақты келіссөздер жүргізеді деп күтілуде.
Қазақстан үшін бұл – энергетика, сирек кездесетін металдар және көлік логистикасы саласындағы жапон инвестициясын тартуға таптырмас мүмкіндік. Әсіресе, атом энергетикасы мен өнеркәсіптік технологиялар трансферті мәселесі күн тәртібінде болуы мүмкін.
