Шымкентте білім беруге бөлінген бюджет қаражатын жымқыру бойынша қылмыстық іс тергеліп жатыр, деп хабарлайды Todayinfo ақпарат агенттігі.
Қаржы мониторингі агенттігінің (ҚМА) мәліметінше, 2018-2023 жылдар аралығында екі колледжде жалған оқыту схемасы жұмыс істеген.
Тергеу нұсқасы бойынша, бұрын сотталған азаматша колонияда отырып, осы қылмыстық схеманы ұйымдастырған. Ол арқылы 1 миллиард теңгеден астам қаражат жымқырылған.
Алаяқтық схема «Оңтүстік Қазақстан жоғары медициналық колледжі» ЖШС және «Оңтүстік Қазақстан гуманитарлық-қаржы колледжі» ЖШС негізінде жүзеге асырылған.
ҚМА мәліметінше, азаматтар студент ретінде ресми түрде тіркелгенімен, іс жүзінде оқымаған. Бұл білім беру тапсырысы және кадрларды қайта даярлау бағдарламалары бойынша мемлекеттік қаржыландыруды алуға мүмкіндік берген.
Қылмыстық схема жалған қабылдау және жұмысқа орналастыру бұйрықтарын ресімдеу, құжаттарды растау үшін электрондық цифрлық қолтаңбаларды пайдалану, сондай-ақ орындалған жұмыстардың жалған актілерін жасау арқылы іске асырылған.
Сонымен қатар, медициналық колледждің ақылы бөлімінің бірқатар студенттері мемлекет есебінен оқып жатқандар ретінде ресімделген.
Іс бойынша колледж басшылары, бухгалтерлер және басқа да үлестес тұлғалар өтуде.
