Талапкерлердің таласы: қандай мамандықтарға төменгі баллмен грант ұтуға болады

13 шілдеде білім беру гранттарын тағайындау конкурсына қатысу үшін өтініштер қабылдау кампаниясы басталды, деп хабарлайды Todayinfo тілшісі Ғылым және жоғары білім министрлігіне сілтеме жасап. Қабылдау 20 шілдеге дейін жүргізіледі.

"Бірінші күннің қорытындысы бойынша 10 мыңнан астам талапкер грант конкурсына қатысуға ниет білдіріп, өтінішін жіберді. Ең көп өтініш «Педагогикалық ғылымдар» және «Инженерлік, өңдеу және құрылыс салалары» бағыттарына берілді", — делінген министрлік таратқан ақпаратта.

Естеріңізге сала кетсек, биыл құжаттарды egov.kz порталы арқылы онлайн немесе жоғары оқу орындарындағы қабылдау орталықтары арқылы (кез келген жақын орналасқан ЖОО-да) тапсыруға болады. Атап өтсек, грант конкурсына қатысу үшін талапкерлер жеке куәлік, ҰБТ сертификатын; 3×4 көлеміндегі фото, орта білім туралы аттестат (техникалық және кәсіптік білім беру ұйымдарының түлектері үшін диплом) тапсыру керек. Сондай-ақ жеңілдетілген санат бойынша конкурсқа қатысу үшін растайтын құжаттар ұсынылады. Ел көлемінде ең көп грант техникалық мамандықтарға бөлінген. Былтырғы статистиканы есепке ала отырып санағанда, ең төменгі 51-52 балл жинаған талапкерлер де грантқа түсу мүмкіндігіне ие.