Мәжіліс депутаттары "Теңізшевройл", "Қазақмыс" және "Қазмырыш" сияқты ірі компанияларды қаржылық есептерін халыққа жария етуге міндеттеуді ұсынды, деп хабарлайды Todayinfo ақпарат агенттігі.
Мәселе мынада: аталған компаниялар акционерлік қоғам (АҚ) емес, жауапкершілігі шектеулі серіктестік (ЖШС) түрінде жұмыс істейді. Бұл оларға тек өз иелерінің алдында есеп беруге мүмкіндік береді, ал қоғамдық бақылаудан тыс қалады. Осының кесірінен депутаттар мен қарапайым халық жер қойнауының қалай игеріліп жатқанын толық бағалай алмай отыр.
"Ақ жол" фракциясының мүшелері өздерінің депутаттық сауалында Конституцияның жаңа редакциясында да жер мен оның қойнауы халыққа тиесілі екені бекітілгенін еске салды.
"Конституция бойынша жер және оның қойнауы халықтікі. Бірақ оны игеріп отырған компаниялардың қызметі жабық болса, бұл норма қалай орындалады?", - дейді депутаттар.
Осыған байланысты партия екі нақты ұсыныс жасады. Біріншіден, мұнай-газ және тау-кен металлургия саласындағы табысы 3 миллион АЕК-тен (12,9 млрд теңге) асатын барлық ірі жер қойнауын пайдаланушыны ақпаратты ашық компаниялармен бірдей стандартта жариялауға міндеттеу керек.
Екіншіден, кен өндіретін жаңа компанияларды тек акционерлік қоғам (АҚ) түрінде тіркеуді талап ету ұсынылды. Бұл шара болашақта олардың қызметінің басынан бастап ашық болуын қамтамасыз етеді.
