Ақордада Монғолия Президенті Ухнаагийн Хүрэлсүхтің Қазақстанға мемлекеттік сапармен келуінің салтанатты кездесу рәсімі өтті.
Ресми іс-шаралардан кейін мемлекет басшылары Қасым-Жомарт Тоқаев пен Ухнаагийн Хүрэлсүх тар құрамда келіссөздер жүргізді, кейін олар делегация мүшелерінің қатысуымен кеңейтілген форматта жалғасты.
Тараптар Қазақстан мен Монғолия арасындағы ынтымақтастық достық, өзара қолдау және стратегиялық серіктестік рухында дамып жатқанын атап өтті.
Қазақстан Президенті монғол көшбасшысына сапары үшін алғыс айтып, 2024 жылғы қазанда Монғолияға жасаған сапарын жылы лебізбен еске алды. Оның айтуынша, сол кезде екіжақты қатынастарды жаңа деңгейге көтеруге мүмкіндік берген маңызды уағдаластықтарға қол жеткізілді.
Мемлекет басшысы сауда-экономикалық байланыстардың нығаюын және елдер арасындағы тауар айналымының өсуін атап өтті. Ол Астанада Монғолия компанияларының қатысуымен қазақ-монғол бизнес-форумы өтіп жатқанын және Қазақстан іскерлік ынтымақтастықты дамытуды қолдайтынын айтты.
Қазақстан тарапының мәліметі бойынша, 2025 жылы өзара сауда көлемі 7,7%-ға өсіп, 130 млн доллардан асты.
Монғолия Президенті оның сапары екіжақты қатынастарды дамытуға қосымша серпін беретініне сенім білдірді. Ол Қазақстан Монғолия стратегиялық серіктестік орнатқан Орталық Азиядағы алғашқы мемлекет екенін атап өтті.
Оның айтуынша, Монғолияның сыртқы саясатының басымдығы Қазақстанмен ынтымақтастықты одан әрі нығайту, оның ішінде сауда-экономикалық байланыстарды кеңейту болып табылады. Ол 2024 жылы Қазақстан Президентінің сапары қорытындысы бойынша 2025–2027 жылдарға арналған ынтымақтастықты дамытудың жол картасы қабылданғанын, онда тауар айналымын 500 млн долларға дейін арттыру көзделгенін еске салды.
Ухнаагийн Хүрэлсүх сондай-ақ Қасым-Жомарт Тоқаевты жаңа Конституцияны қабылдау бойынша жалпыұлттық референдумның сәтті өткізілуімен құттықтап, оның елдің одан әрі дамуы үшін маңыздылығын атап өтті.
Келіссөздер барысында тараптар ауыл шаруашылығы, жеңіл өнеркәсіп, цифрландыру, тау-кен өнеркәсібі, туризм, көлік және логистика салаларындағы ынтымақтастық перспективаларын, сондай-ақ өңіраралық өзара іс-қимыл мәселелерін талқылады.
Мемлекет басшылары Үкіметаралық комиссия жұмысын жандандырудың, Астана – Ұлан-Батыр және Өскемен – Өлгий бағыттары бойынша әуе қатынасын қалпына келтірудің, сондай-ақ елдер арасында тікелей автомобиль жолы қатынасын ашу мәселесін пысықтаудың маңыздылығын атап өтті.
Қазақстан Президенті сондай-ақ монғол тарапына Қазақстанның Баян-Өлгий аймағында консулдық мекемесін ашуға қолдау көрсеткені үшін алғыс білдірді.
Сонымен қатар, білім, мәдениет және туризм салаларындағы ынтымақтастықты кеңейту мәселелері талқыланды.
Фото: Ақорда
