Тоқаев құрылыс сапасын қатаң бақылауға шақырды: цифрландыру және ашықтық күшеймек

Мемлекет басшысы Қасым-Жомарт Тоқаев тұрғын үй құрылысының сапасына қатысты талапты күшейту керегін айтты. Президенттің сөзінше, үй салуда сан қумау керек, бастысы – қауіпсіздік пен сапа. Ол Астанадағы құрылыс қарқыны ел бойынша алдыңғы қатарда екенін атап өтті. Жыл басынан бері елордада 5 миллион шаршы метр тұрғын үй салынған, бұл – Қазақстанда пайдалануға берілген үйлердің төрттен біріне тең.

Сан артқан сайын сапа әлсіреп кетпеуі керек

Президенттің айтуынша, жақсы көрсеткішке қарамастан, кейбір құрылыс нысандарында сапа мәселесі ушығып тұр. Соған мысал ретінде тұрғын үйдің сыртқы қаптамасының опырылуы және басқа бір үйде лифттің құлау оқиғасын келтірді. Мемлекет басшысы мұндай жағдайлар қайғылы оқиғаға ұласқанын айтып, жауапкершілікті нақтылауды талап етті. Оның пікірінше, сапасыз материал пайдалану, құрылыс ережелері мен қауіпсіздік талаптарын сақтамау – аса ауыр құқықбұзушылық.

Құрылыстың барлық кезеңін цифрландыру және бақылауды күшейту

Тоқаев Үкімет құрылыстың бүкіл циклін толық цифрландыруы керек екенін айтты. Яғни жобалаудан бастап, дайын нысанды тапсыруға дейінгі барлық үдеріс цифрлық бақылауда болуы тиіс. Президент бұл шара салада тәртіп орнатуға және жұмыстың сапасын қамтамасыз етуге көмектесетінін атап өтті. Сонымен қатар аймақ әкімдеріне елді мекендердің цифрлық көшірмесін жасап, барлық нысанның жай-күйін тұрақты бақылауда ұстау міндетін жүктеді. Мемлекет басшысы құрылыс компанияларының жауапкершілігін күшейту қажет екенін бөлек атап өтті. Оның сөзінше, үй салып жатқан компаниялар мен мердігерлер туралы ақпарат, сондай-ақ сараптама нәтижелері ашық әрі халыққа қолжетімді болуы керек.