Тоқаев журналистерге үндеу жасады: елдің егемендігін қорғау – басты міндет

Президент Қасым-Жомарт Тоқаев Ұлттық басылым күніне орай Қазақстан журналистерін кәсіби мерекесімен құттықтады, деп хабарлайды Todayinfo ақпарат агенттігі. Мемлекет басшысы өз құттықтауында бұқаралық ақпарат құралдарының «Әділетті Қазақстанды» құрудағы және қоғамда «Заң мен тәртіп» қағидатын орнықтырудағы рөлін ерекше атап өтті. Сонымен қатар Тоқаев медиа өкілдерін конституциялық реформа мен мемлекеттік жүйені жаңғыртуға бағытталған ауқымды өзгерістерді халыққа жеткізуде сындарлы болуға шақырды.

«Патриотизм ұғымына жауапкершілік пен жасампаздық тұрғысынан қарау керек. Заңды құрметтеу арқылы егемендік пен тәуелсіздікті қорғау – ұлты мен дініне қарамастан әрбір отандасымыздың міндеті. Отандық журналистер осы аса маңызды іске белсенді атсалысатынына сенімдімін», – деді Президент.

Сөз соңында Мемлекет басшысы сала мамандарына толағай табыс пен бақ-береке тіледі.