Түрік әуе компаниялары орындарынан ерте тұрған жолаушыларға айыппұл салатын болды

Түркияның Азаматтық авиация бас басқармасының (SHGM) жаңа қаулысына сәйкес, түрік әуе компаниялары ұшақ толық тоқтамай тұрып орындарынан тұрып кеткен, жолжүк сөрелерін ашқан немесе бортсеріктердің ескертулерін елемеген жолаушыларға айыппұл салуға құқылы. Turkish Airlines әуе компаниясы осы жаңа ережелерге байланысты бортсеріктерге жолаушыларды міндетті түрде алдын ала хабардар етуді тапсырған.

«Ұшақ қозғалысы кезінде орындарынан тұрып кету немесе жолжүк бөлімдерін ашу – жарақат пен оқыс оқиғаларға жиі себеп болатын жағдайлар. Сондықтан бұл ереже – қауіпсіздікті қамтамасыз етудің бір бөлігі», – деп түсіндірді компания өкілі.

Аталған тәртіп бұзушылықтар үшін салынатын айыппұлдар Түркияның қолданыстағы азаматтық авиация заңнамасына сәйкес қарастырылған. Құжатта нақты айыппұл көлемі көрсетілмесе де, мұндай әрекеттер үшін жауапкершілік заң жүзінде бекітілген. Бұл бастама ұшақтағы тәртіпті нығайтуға және жолаушылар қауіпсіздігін арттыруға бағытталған. Әуе компаниялары, соның ішінде Turkish Airlines, бұл ереженің тек тәртіп емес, қауіпсіздік үшін де маңызды екенін ерекше атап өтуде.