Украина президенті Владимир Зеленский журналистерге берген сұхбатында АҚШ-тың соғысты тоқтатуға бағытталған жаңа ұсыныстарын жариялады. Вашингтонның жоспарына сәйкес, тараптар келіссөзді Майамиде өткізіп, қарулы қақтығысты жазға дейін аяқтауы мүмкін, деп хабарлайды Todayinfo ақпарат агенттігі.
Зеленскийдің айтуынша, Америка Құрама Штаттары соғыстың аяқталу мерзіміне қатысты нақты бағдар беріп отыр. Бұл жоспар Украина мен Ресей арасындағы келіссөздердің жаңа кезеңіне жол ашуы ықтимал.
"Олар бәрін маусым айына дейін аяқтағысы келетінін айтты. Соғыс дәл осылай аяқталуы үшін қолдан келгеннің бәрін жасайды. Барлық оқиғаларға нақты кесте болғанын қалайды", - деді Зеленский.
Осы мақсатта АҚШ бір аптадан кейін Майамиде келіссөздер тобының кездесуін өткізуді ұсынған. Украина тарапы бұл ұсынысқа келісімін бергенін растады. Сонымен қатар Вашингтон энергетикалық инфрақұрылымға соққы беруді тағы да тоқтату туралы бастама көтерген. Бұған Киев келіскен, ал Ресей делегациясы жауап беруге уәде еткен.
Жоспар аясында АҚШ Донецк облысында еркін экономикалық аймақ құру идеясын да ұсынған. Бұған қоса, Вашингтон болашақта атысты тоқтатуды бақылау процесіне тікелей қатысатынын растады. Зеленский бұл Еуропаның процестен тыс қалатынын білдірмейтінін атап өтті.
Сондай-ақ Украина президенті Ресейдің ықтимал қадамына қатысты ескерту жасады.
"Егер "Орешник" зымыраны Беларусь аумағынан бір рет қолданылса, бұл елді соғысқа тартады. Ресейліктер соны қалайды", - деп атап өтті ол.
Фото: Әлеуметтік желіден
