Желіде «Қазақстанның жаңа паспорты» талқыланды: ІІМ бұл суреттерге қатысты не деді

Әлеуметтік желілерде Қазақстан азаматының паспортының «жаңа дизайны» ретінде таратылған эскиз қызу талқыға түсті. Көпшілік құжаттың сыртқы көрінісі Оңтүстік Корея паспортына ұқсайды деп, пікірталасқа кірісті. Бұл туралы Todayinfo порталы хабарлайды. Желіде «ағып кеткен» делінген суреттер тез арада трендке айналды. Бір бөлігінің айтуынша, ықтимал нұсқа заманауи әрі жинақы көрінеді, ал басым пікір қолданыстағы көгілдір (бирюзовый) паспортты сақтап қалуды қолдайды. Пікір білдірушілер қазіргі паспорттың шетелде жақсы танылатынын, түсі мен стилі Қазақстанмен визуалды түрде байланысып тұратынын да жиі атап өтті.

ІІМ не дейді: «эскиз бізге қатысы жоқ»

Соцжелідегі талқының тағы бір маңызды тұсы – бұл фотолардың ресми арналарда жарияланбағаны. Сондықтан көпшілік оны бекітілген немесе ресми түрде ұсынылған нұсқа деп қабылдауға болмайтынын ескертті. Ішкі істер министрлігі желіде жүрген материалдың нақты жобаға қатысы жоқ екенін растады. «Көрсетілген материал Қазақстан Республикасы азаматының жаңа паспортының әзірленіп жатқан дизайнына қатысы жоқ», – деп мәлімдеді ведомство.

Жаңа паспорт әзірленіп жатыр, басты назар – қауіпсіздікте

Министрлік жаңа дизайн бойынша жұмыс жүріп жатқанын жоққа шығармайды, бірақ жоба әзірге дайын емес, әзірлеу кезеңінде екені айтылды. Негізгі екпін сыртқы келбеттен бұрын, құжаттың қорғаныс деңгейін күшейтуге қойылған. ІІМ мәліметінше, жаңа паспортты жасауда заманауи қорғаныс технологиялары және ICAO (Халықаралық азаматтық авиация ұйымы) талаптары ескеріледі. Қоғам пікірін назарға алу мүмкіндігі де белгіленген рәсім аясында қарастырылады. Айта кетейік, Henley Passport Index дерегіне сүйенсек, Қазақстан паспорты әлемде 67-орында тұр және қазақстандықтарға 78 елге визасыз баруға мүмкіндік береді.