Ақтауда апатқа ұшыраған Azerbaijan Airlines әуе компаниясының ұшағынан аман қалған жолаушылардың бірі, Қырғызстан азаматы, қазір жатқан ауруханада журналистермен әңгімелесті, деп хабарлайды Todayinfo.kz.
View this post on Instagram
Қырғызстандық жолаушы Эрлан Джунушалиевтің оқиға туралы естелігі
24.kz телеарнасының мәліметінше, ер адамның есімі — Эрлан Джунушалиев. Оның омыртқасы сығымдалып сынған және денесінде көптеген көгерген жерлері бар.
Зардап шегуші ұшақ апатқа ұшырағаннан кейін оқиға орнына қазақстандық құтқарушылардың келгенін айтты. Сол кезде жолаушылар ұшақтың қай жерге құлағанын әлі білмеген.
«Қатты соққы болды. Мен есімнен танып қалдым, сондықтан құтқарушылардың қашан келгенін түсінбедім», — деді қырғызстандық азамат.
Оның айтуынша, ұшақ аударылып қалған, сондықтан жолаушылар аяқтары жоғары қарап жатқан. Құтқарушылар зардап шеккендерді қауіпсіздік белдіктерінен босатып, сыртқа шығарды.
«Бізді шығарғаннан кейін біз: «Сендер кімсіңдер?» деп сұрадық. Олар: «Қазақтар» деп жауап берді. Біз жылап жібердік. Біз басқа елге тап болдық деп ойладық», — деді ол.
Ақтаудағы ұшақ апаты: хронология
Естеріңізге сала кетейік, 25 желтоқсанда Ақтау маңында Azerbaijan Airlines әуе компаниясының Баку (Әзербайжан) – Грозный (Ресей) бағыты бойынша AHY8243 рейсін орындаған жолаушылар ұшағы апатқа ұшырады.
Ұшақ Астана уақытымен 08:49-да Баку әуежайынан жоспарланған уақыттан 11 минут ерте ұшып шықты. Кейінірек экипаж «төтенше жағдай» (squawk 7700) сигналын берген. Ұшқыштар Ақтау әуежайына шұғыл қонуға рұқсат сұрады. Әуежай кемені қабылдауға дайындалды, бірақ 11:30-да ұшақ әуежайдан 3 шақырым жерде құлады.
Қазақстан ТЖМ мәліметінше, ұшақ бортында 62 жолаушы және 5 экипаж мүшесі болған:
- 42 Әзербайжан азаматы;
- 16 Ресей азаматы;
- 6 Қазақстан азаматы;
- 3 Қырғызстан азаматы.
Апаттан Әзербайжан, Ресей және Қырғызстан азаматтары аман қалды. Қазақстандықтар арасында аман қалғандар жоқ.
