Видеодан алынған кадр
Солтүстік Қазақстан облысында көпір құлап, астық тиелген ауыр жүк көлігі өзенге құлап кетті, деп хабарлайды Todayinfo.
Оқиғаның куәгерлері әлеуметтік желіде бұл жағдай Ғабит Мүсірепов ауданы аумағында болғанын жазуда. Бірлік ауылын өзеннің қарсы бетімен байланыстырып тұрған шағын көпір үлкен көліктің салмағын көтере алмаған. «Shacman» маркалы астыққа толы жүк көлігі көпірден өткен сәтте, құрылым жүктемені көтере алмай құлап кеткен. Соның салдарынан жергілікті тұрғындар ең қысқа жолдан айырылды.
Ғабит Мүсірепов ауданының әкімдігі орын алған оқиғаға жүргізушінің өзін кінәлады.
«Бірлік пен Нежинка ауылдарын байланыстыратын жасанды өткел «ES Global Agro» ЖШС күшімен салынған және ресми автожол мәртебесіне ие емес. Жолды қысқарту мақсатында «Shacman» маркалы жүк көлігінің жүргізушісі осы өткелді пайдаланған. Алайда құрылым салмақты көтере алмай, құлап, көліктің аударылуына әкелді. Жапа шеккендер жоқ. Қазіргі уақытта жүк көлігін эвакуациялау жұмыстары жүргізіліп жатыр, содан кейін өткелді қалпына келтіру жұмыстары басталады. Сонымен қатар жаңа көпір салу үшін жобалық-сметалық құжаттама дайындалып, қазіргі таңда мемлекеттік сараптамадан өтуде», – делінген әкімдік хабарламасында.
Фото: ҚазАқпарат
