Фото: shygystanu.kz
Қазақстан халықаралық өзгерістерге бейжай қарап отырған жоқ, себебі бұл үдерістер елдің ұлттық мүдделеріне тікелей әсер етеді. Мемлекет басшысы Қасым-Жомарт Тоқаев әлем барған сайын болжап болмайтын сипат алып бара жатқанын атап өтті. Оның айтуынша, климаттың өзгеруі, жаппай көші-қон, аймақтық қақтығыстар мен экономикалық дағдарыстар әлемдік жүйеге бұрын-соңды болмаған қысым түсіруде, деп хабарлайды Todayinfo.kz ақпарат агенттігі.
Президенттің пікірінше, қазіргі халықаралық басқару жүйелері бұл сын-қатерлерге тиімді жауап бере алмай отыр. Әсіресе, Біріккен Ұлттар Ұйымы сияқты көпжақты институттардың өз миссиясын толық атқара алмауы — осының айқын көрінісі. Ірі державалар күн тәртібіндегі маңызды мәселелер бойынша келісе алмай, әлемдік шиеленістерді шешу ісінде тұйыққа тірелген.
Осыған байланысты Мемлекет басшысы Тоқаев әлемдік қауымдастықты жаңа шындықты мойындауға және көпжақтылық қағидатын қайта қарауға шақырды. Оның айтуынша, қазіргі жаһандық тәртіпте орта державалардың рөлі артып келеді.
«Бұл елдердің байсалды әрі сындарлы ұстанымы — жаһандық белгісіздік жағдайында үлкен артықшылық. Ірі державалар келісімге келе алмай жатқанда, дәл осы орта державалар диалог орнату мен ынтымақтастықты сақтауда делдалдық рөл атқара алады», — деді Президент.
2020 жылы қабылданған Қазақстан Республикасының 2020–2030 жылдарға арналған сыртқы саяси тұжырымдамасы елдің сыртқы бағытының сабақтастығын сақтай отырып, жаңа заман талабына бейімделді. Құжаттың басты мақсаты — көпвекторлы және теңгерімді саясатты жалғастыру, халықаралық құқық нормаларын сақтау және ұлттық мүддені қорғау.
Қазақстан әлемдік дипломатияда бейбіт диалогтың және келіссөз алаңының орталығына айналды. Бұған нақты мысалдар — ел аумағында өткен Әзербайжан мен Армения арасындағы келіссөздер, Сирия мәселесіне қатысты Астана процесі, сондай-ақ Иранның ядролық бағдарламасы бойынша кездесулер. Сонымен бірге, еліміз Әлемдік және дәстүрлі діндер көшбасшыларының съездерін өткізіп, конфессияаралық диалог мәдениетін қалыптастырды.
Қазақстанның сыртқы саясаты — прагматикалық және теңгерімді дипломатиялық стратегия. Ол халықаралық қауымдастықпен өзара тиімді серіктестік орнатып, ұлттық мүддені қорғауға бағытталған.
Мемлекет басшысы Қасым-Жомарт Тоқаев айтқандай:
«Мазмұнды диалог пен ынтымақтастықты дамыту үшін ашықтық, төзімділік және ымыра қажет».
