Көші-қон заңнамасын бұзғандарды полицейлер анықтады. Шетелдік төрт азаматтың Қазақстан аумағында жүргеніне 30 тәуліктен асып кеткен.
Павлодар облысы Шарбақты ауданының полиция қызметкерлері рейдтік іс -шаралар жүргізу барысында ел аумағында заңсыз жүрген Өзбекстан Республикасының азаматтарын анықтады. Олар көші-қон заңнамасын бұзып, елден кетуден жалтарған.
«Шетелдік төрт азамат өткен жылдың қарашасында Қазақстанға келіп, содан бері аялдап қалған. Заң бойынша олар 30 тәулік ішінде Қазақстан Республикасынан тыс жерлерге шығуға тиіс болған. Бірақ шетелдіктер белгіленген мерзімде кетуден жалтарып, сол арқылы көші-қон саласындағы заңнаманы бұзды. Құқық бұзушыларға әкімшілік материал толтырылды және сот шешімімен Қазақстан Республикасынан тыс жерлерге мәжбүрлі түрде шығару туралы әкімшілік шара қолданылды» деп хабарлады Павлодар облысы полиция департаментінің баспасөз қызметі.
Тәртіп сақшылары оларды Ресей Федерациясына бара жатқан автобусқа алып барып, отырғызып жіберген. Жыл басынан бері Павлодар облысында көші-қон заңнамасын бұзған 13 шетелдік азамат елден шығарылды.
