Белгілі әзілкеш Тұрсынбек Қабатовтың үшінші қызы Айару әлеуметтік желіде әкесімен қарым-қатынасы туралы ойын бөлісті, деп хабарлайды Todayinfo.
Айарудың айтуынша, қоғамда түрлі әңгіме мен сын болса да, ол әрдайым әкесін жақсы көріп, оған ерекше сыйластықпен қарайды.
«Қазір көп адам оны жаман адам деп айтып жатыр. Бірақ мен үшін ол әрдайым ең керемет әке болып қала береді. Мен оны өмірімдегі ең қымбат жан ретінде көремін. Күйеу ретінде кейбір қателіктері болған шығар, бірақ әке ретіндегі орнын ешкім баса алмайды. Ол бізге деген махаббатын әрқашан сездіріп келеді. Қазір арамыз жақсы, бәрін ашық айтып, сөйлестік», – деп жазды Айару Қабатова.
Сондай-ақ ол әкесіне қарсы айтылып жатқан ауыр сөздер мен теріс пікірлер өзіне ауыр тиетінін жасырмады.
«Маған ең жақын адамды жамандаған пікірлерді оқу өте қиын. Ондай сәтте оны барынша қорғағың келеді, бірақ менің сол әрекетімді ешкім байқамайтындай», – деді ол.
Айта кетсек, бұған дейін продюсер Мөлдір Мұқанова Тұрсынбек Қабатовпен ресми түрде ажырасқанын мәлімдеп, олардың некесіне 14 жыл бұрын үшінші адамның араласқанын айтқан еді. Осы оқиғадан кейін әлеуметтік желілерде Қабатовқа қатысты түрлі пікірлер мен сындар тараған болатын.
Фото: instagram.com
