Танымал журналист, қоғам қайраткері Гүлмира Әбіқай елімізе танымал спортшылардың аянышты халін айтып, билікке жанайқайын жеткізді. Гүлмира Әбіқай өз ойын желідегі парақшасында білдірді, деп хабарлайды Todayinfo.kz
«Үлкен спортқа кезінде өзім ауылда өсіп жете алмай қалдым. Биіктікке секіргенді жақсы көрдім. Көрші-қолаң, көшедегі қоршау-қораны қалдырмай секіріп, босқа алаөкпе болдым. Біздің ауылда еш үйірме, секция болған жоқ.
Баламды 3 жасынан дзюдо, 4 жасынан футболға беремін деп жүр ем…Кешегі зілтеміршіден күзетшіге айналған Алмас Өтешовты, бүгінгі тәпішкесі жыртық Олимпиада чемпионы Болат Жұмаділовты көріп, ойымнан айнып қалдым. Адам спортты көтергенімен, спорт адамды көтермейді екен. Көк тудың мәреде желбірегеніне ел болып қуанғанымен, спортшының басынан сипамайды екен.
Жазда @irm.astana тегін квота алуға келген самбошы чемпион қызымыз Динара да жылап еді. Республикалық, халықаралық жарыстан талай мәрте бас жүлдені алғанымен, диплом-гүлден артық сый бермепті. Күресіп жүріп, қыз дәуренім де өтті. Енді ана бола алмай қиналып жүрмін” деп егіліп еді. Эххх… отандық спортқа бір жанашыр келмеді-ау. Кезінде тарихшы-композитор Арыстанбек Мұхамедиұлы да басқарып еді ғой», — деп жазды ол.
Фото: caravan
