Белгілі тележүргізуші, қоғам қайраткері Ләйлә Сұлтанқызы жақында «КешREC» бағдарламасына берген сұхбатында баласының әкесі – Қайратты сағынғаны туралы жан тебірентерлік оқиғаны бөлісті, деп хабарлайды Todayinfo.
Журналисттің айтуынша, кенже ұлы Сардардың көзінде жас толып тұрғанын байқап, ана жүрегі шымырлаған.
«Кешкісін бөлмесіне кірсем, менен тығылып, сұрақтарыма теріс қарап жауап берді. Көзінен жас көріп, не болғанын сұрасам, телефонын тазалап отырып, әкесінің суреттері мен видеоларын көргенін айтты», – деді Ләйлә Сұлтанқызы.
Тележүргізушінің айтуынша, Сардар бұған дейін сезімін ашық білдірмеген, тек ішкі жан күйзелісін сыртқа шығармай, әрдайым көңілді көрінуге тырысқан. Алайда бұл жолы баланың әкеге деген сағынышы көз жасымен көрініс тапты.
«Баламның көз жасын көргенде, жүрегім ауырды. Бірақ мені жұбатқан да – сол балам. «Анашым, уайымдамауға тырысамыз, иә?!» – деп өзіме демеу болды», – дейді ол.
Ләйлә Сұлтанқызы марқұм жұбайы Қайратты ерекше сағынышпен еске алып, Жаңа жылдан бастап ол туралы көпшілік алдында айтпауға өзіне уәде бергенін жеткізді.
«Қазақстанда жалғыз жесір мен емеспін. Бірақ бұл сезімді басынан өткерген адам ғана түсінеді. Алайда бір ғана нәрсені айтқым келеді: егер ер азамат болса, Қайраттай болсын!» – деп түйіндеді сөзін.
