Адвокат Ләззат Ахатова «Уақыт көрсетеді» жобасының жүргізушісі Нұрсейіт Жылқышыбайды сотқа бермек, деп хабарлайды Todayinfo.
Заңгердің айтуынша, жүргізуші өз бағдарламасында Ахатованың ар-намысына тиетін сөздерді қолданған.
«Журналист(сымақ) Нұрсейіт Жылқышыбай дегеннің мекен-жайын білетін адам болса, үлкен өтініш, жекеге жазыңыздаршы. Соттылықты анықтап алу үшін, нақты адресі керек. Менің жеке өміріме қатысты эфирде курстасым Мұхамеджан Тазабекке (жиі сөйлесіп тұрады екенсіз деген сияқты) шындыққа жанаспайтын өзінің долбарын сұрақ ретінде тықпалап, ар-намысқа тигені үшін сотқа беретінімді мәлімдеймін»,- деп жазды ол.
Ләззат Ахатова коуч курстасы Мұхамеджан Тазабекпен жақын араласпайтынын айтты.
«Мұхамеджанның телефонын да білмейді екем. Жаңа қарасам, соңғы рет былтыр 2024 жылдың наурыз айында оразаның алдында мессенжер арқылы сөйлесіппіз. Астанаға келгенде, курстастар шәй ішейік депті. Бір жарым жылда бір мессенжер арқылы сөйлесу — жиі хабарласқанға жата ма? Сотта сол сұрақтарға жауап берсін, ендеше»,- деп ашуланды адвокат.
Айта кетсек, Нұрсейіт Жылқышыбай YouTube-тегі бағдарламасына Мұхамеджан Тазабекті қонаққа шақырған. Сол кезде «Студент кезіңізде Ләззат Ахатоваға ғашық болыпсыз, қазір ол кісі ажырасқан, ұрпақ өрбіту ойыңызда бар ма?» деп ерсі сұрақтар қойған. Мұхамеджан Тазабек курстасымен тек сыйласатынын айтты, ал сезім туралы сөздердің бәрін жоққа шығарды.
