Almaty TV телеарнасы ұсынатын «Made in Almaty» бағдарламасының кезекті шығарылымы отандық сабын өндірісіне арналды. Бағдарламада Алматы қаласында орналасқан, халал стандарттарына сай жұмыс істейтін бірегей зауыт туралы кеңінен ақпарат берілді. Бұл туралы Todayinfo ақпарат агенттігі хабарлайды.
Бүгінде Алматы – еліміздегі кәсіпкерлік белсенділігі ең жоғары мегаполис. Мұнда 420 мыңнан астам шағын және орта бизнес субъектісі бар, оларда 940 мыңға жуық адам еңбек етеді. Солардың бірі – күнделікті тұрмыста қолданылатын және арнайы мақсаттарға арналған 33 түрлі сабын өнімін шығаратын отандық зауыт.
«Біздің зауыттың негізі 2014 жылы қаланды. Ол кезде қазақстандық нарықта отандық сабын өнімдері жоқтың қасы еді. Біз бұл олқылықтың орнын толтыру үшін қауіпсіз әрі сапалы өнім өндіруге бел будық. Бүгінгі өнімдеріміздің ерекшелігі – тіпті сәбилерге де қолдануға жарамды», – дейді коммерциялық бөлім бойынша директордың орынбасары Аида Даненова.
Заманауи технология және халықаралық стандарттар
Өндірістік процесте Түркиядан жеткізілген заманауи құрылғылар пайдаланылады. Негізгі шикізат – Малайзиядан әкелінетін табиғи пальма майынан жасалған сабын гранулалары. Ал хош иістендіргіштер мен дәрумендер Германия мен Түркиядан импортталады.
«Біз қолданатын сабын түйіршіктері сапасы жағынан жоғары санатқа жатады. Өндіріс барысында олар глицерин, су және табиғи қоспалармен араластырылып, салқындату мен қыздыру сатыларынан өтеді. Кейін арнайы құрылғыда қалыпқа келтіріліп, әртүрлі өнім түрлеріне бөлінеді», – деп түсіндірді кәсіпорын қызметкері Айгерім Сейсенбай.
Кәсіпорын халықаралық халал стандарттарына сай сертификатталған. Сабын құрамында тыйым салынған қоспалар мүлде жоқ, бұл оның экологиялық және діни талаптарға сай екенін растайды.
Экспорт пен даму бағыты: Ресейден Қытайға дейін
Қазіргі таңда зауыттың өнімдері Ресей, Ингушетия, Шешенстан мен Краснодар өлкесіне экспортталады. Алдағы уақытта кәсіпорын Қытай нарығына шығуды көздеп отыр. Осы мақсатта кір жуғыш ұнтақ пен дерматитке қарсы сабын сынды жаңа өнімдер шығаруға дайындық жүріп жатыр.
Мемлекет тарапынан да қолдау бар. Мысалы, «Даму» қоры құрылған сәттен бастап жалпы құны 2,2 трлн теңгеге жуық 20 мыңнан астам жобаны қаржыландырған. Оның 85 пайызы микро және шағын бизнеске тиесілі.
