Фото: stepnogorsk.kz
10 айдың қорытындысы бойынша өңір экономикасына тартылған инвестиция көлемі 932,9 млрд теңгеге жетіп, 4,1% өсім көрсетті. Жыл соңына дейін бұл көрсеткішті 1,5 трлн теңгеге жеткізу жоспарланып отыр, деп хабарлайды Todayinfo.kz ақпарат агенттігі.
Шағын және орта бизнесті қолдау мақсатында өңірде бұрын-соңды болмаған қолайлы жағдай жасалды. Қарағанды облысы бөлшек сауда салығының мөлшерлемесін 2%-ға дейін төмендеткен алғашқы аймақтардың бірі болды. Соның нәтижесінде салық төлеушілердің саны 30 есеге артып, бастапқы 130 кәсіпкерден 4 мыңнан астамына дейін көбейді.
Бизнес тарапынан бюджетке түсетін түсімдер 16%-ға өсіп, 299 млрд теңгені құрады. Кәсіпкерлікті қолдауға субсидиялар, жеңілдетілген несиелер мен гранттар арқылы жалпы 14,5 млрд теңге бағытталды.
ШОБ дамуына елеулі үлес қосып отырған негізгі бағыт – сауда саласы. Аймақта көтерме және бөлшек сауда желісі цифрлық сату арналарына белсенді түрде көшіп жатыр. Жыл қорытындысы бойынша өңірдің ішкі сауда айналымы 5,6 трлн теңгеге жетеді деп күтілуде, бұл көрсеткіш 9% өсімге тең. Осылайша Қарағанды облысы ел бойынша төртінші орынға шығатын болады.
Облыс әкімінің айтуынша, бизнес пен мемлекеттік органдар арасындағы сенім артып келеді.
«Бұл – ашық және тұрақты салық саясатының нәтижесі», – деді өңір басшысы.
