Мемлекет Басшысы Қасым-Жомарт Тоқаев 2024 жылғы 2 қыркүйекте Қазақстан халқына Жолдауында «Таза Қазақстан» экологиялық акциясы туралы айтты. Ол елімізде көктемнен бастап «Таза Қазақстан» жалпыұлттық экологиялық акциясы өтіп жатқанын еске салды. Бұл, Президент атап өткендей, «уақытша акция емес, бұл маңызды жоба жыл бойы жалғасуы тиіс».
Аталған акциядан Түркістан да тыс қалмады, деп хабарлайды Todayinfo.kz ақпарат агенттігі.
Түркістан қаласында 800-ге жуық адамның қатысуымен кезекті тазалық шарасы ұйымдастырылды. Тазалық жұмыстарына шаһардағы 6 сектор тұрғындары, эко-белсенділер мен қала жастары атсалысты.
– Елімізде жүзеге асып жатқан экоакция аса маңызды шаралардың бірі деп есептеймін. Осы орайда тұрғындардың белсенділігі аса қажет. Тазалық дегеніміз – мәдениет. Мәдениеті жоғары елдің болашағы жарқын. Түркістандықтар барынша жауапты болса дейміз, – деді Түркістан қаласы әкімдігінің инфрақұрылым және коммуникациялар бөлімі бас маманы Мұхаммед Шойынұлы.
Айта кететіні, «Таза Қазақстан» экологиялық акциясы аясында өткен тазалық жұмыстары барысында Б.Саттарханов даңғылы, 9-11 көше, Б. Майлин көшесі, Жарылқапов көшесі, Тынышқұлов көшесі, Қызылорда тас жолы қураған шөптер мен күл-қоқыстан тазартылды.
Түркістан қаласы әкімі баспасөз қызметінің мәліметінше, жиналған қоқыстарды тасымалдауға коммуналдық мекеме қызметкерлері мен 8 техника жұмылдырылды. Жалпы 125 тоннадан астам қоқыс арнайы аумаққа шығарылды. Сонымен қатар «Жаңа қала» аумағындағы көпқабатты тұрғын-үйлер мен коммерциялық нысандар бойынша анықталған кемшіліктер ретке келтірілді.
