Абай облысының әкімі Берік Уәли жұмыс сапарымен Үржар ауданының шалғай ауылдарын аралап, тұрғындармен кездесті, деп хабарлайды Todayinfo ақпараттық агенттігі.
Әкім Лайбұлақ, Жоғарғы Егінсу, Жанай, Барқытбел және Таскескен елді мекендерінің тыныс-тіршілігімен танысты. Бұл – өңір басшысының ауданға соңғы төрт ай ішіндегі үшінші сапары.
Сапар аясында облыс әкімі Лайбұлақ ауылындағы жаңадан салынған медициналық пункттің жай-күйін көріп, нысанды тез арада іске қосу жөнінде жауаптыларға нақты тапсырма берді.
Жоғарғы Егінсу ауылында қазіргі таңда 100 орындық мәдениет үйінің құрылысы жүріп жатыр. Алайда нысан екі жылдан бері аяқталмай келеді. Әкім бұл жұмыстардың мерзімінде аяқталуын тікелей өз бақылауына алатынын мәлімдеді. Сондай-ақ, ауылда жаңа медициналық пункт бой көтерген. Тұрғындар мұнда соңғы 60 жылдан бері жаңа ғимарат салынбағанын айтты.
Жанай ауылында биыл бес көшеге асфальт төселіп, “Ұлттық сапа орталығы” мамандарымен бірге жол сапасы тексерілді. Жалпы, 2024 жылы Үржар ауданындағы төрт елді мекенде 18 көшеге орташа жөндеу жұмыстары жоспарланған.
Сондай-ақ облыс әкімі ауыл тумасы Серікбол Омаровтың жеке қаражатына салынып жатқан спорттық модульге барды. Ауыл жастары үшін қолайлы жағдай жасап жатқан азаматтың бұл бастамасын әкім жоғары бағалап, көпшілікке үлгі етті.
Барқытбел ауылында Берік Уәли 2021 жылы басталған су құбыры желілерінің құрылысына тоқталды. Жоба әлі күнге дейін аяқталмаған. Әкім қажетті қаржы мәселесін қарастырып, оны облыстық бюджетке енгізетінін айтты. Таза ауыз су мәселесі ауыл тұрғындары үшін өзекті болып отыр.
Сонымен қатар, әкім Таскескен ауылында белгілі кәсіпкер, меценат Талғат Сақанның бастамасымен ұйымдастырылған “Ауыл – ел бесігі” фестивалінің ашылуына қатысты. Қазір меценаттың қолдауымен ауылда бірқатар әлеуметтік нысандар бой көтеруде. Атап айтқанда, биыл екі көшеге асфальт төселіп, 100 орынға арналған балабақша құрылысы басталды.
Берік Уәлидің айтуынша, ауылдың дамуына үлес қосып жатқан азаматтардың бастамасы өзге кәсіпкерлерге үлгі болуға тиіс.
«Елге деген сүйіспеншілікті сөзбен емес, іспен дәлелдеген азаматтарды қолдау – біздің ортақ міндетіміз», – деді облыс басшысы.
