2025 жылдың бірінші жартысында оңтүстік астанада 19 мыңнан астам бала туылған. Жүкті әйелдерді босандыруға кеткен 5,4 млрд теңге толығымен Медициналық сақтандыру қоры тарапынан төленді, деп хабарлайды Todayinfo.kz ақпарат агенттігі.
Қордың Алматы қалалық филиалы мәліметінше, босандыруға кететін шығындар толығымен МӘМС қаражаты есебінен жабылады. Ал, босану бағасы оның күрделілік деңгейі мен босандыру әдісіне байланысты өзгеріп отырады. Мысалы, әйел өз бетінше, асқынусыз босанса тарификатор бойынша 100 мың теңге, кесарь тілігімен босанған жағдайда 1,3 млн теңгеге дейін төленуі мүмкін.
Бүгінгі таңда Алматы қаласында 6 перзентхана жұмыс істейді. Олардың бәрі де қалыпты және күрделі жүктілікпен келген әйелдерді босандыруға, сондай-ақ кесарь отасын жасауға маманданған. Жүкті әйелдер МӘМС жүйесінде бұдан басқа мынадай көмек түрлерін пайдалана алады:
Прегравидті даярлық — жүктілікті алдын-ала жоспарлау, әйелді бала көтергенге дейін тексеріп, емдеп, түрлі дерт салдарынан жүктілік кезінде болатын асқынулардың алдын алу. 2025 жылы бұл бағдарламаға Қор тарапынан 673 млн теңге қарастырылған.
Антенаталды бақылау — жүктілік кезінде акушер-гинекологтың тұрақты бақылауында болу, жоспарлы анализдерді тапсыру, ультрадыбыстық зерттеуден, скринингтерден өту, салалық мамандар көмегіне жүгіну т.б. қызметтер бар. Бұған Қор 3,8 млрд теңге бөлді.
Босандыру – қалыпты босандыру, кесарь тілігімен ота жасау, дәрі-дәрмектермен және қосалқы материалдармен қамтамасыз ету. Оған – 12 млрд теңге қарастырылған.
Босанғаннан кейінгі бақылау — алғашқы күндері ана мен балаға көмек.
Неонатальдық көмек — жас нәрестелерді күту, асқынулар болған жағдайда интенсивті терапия жасау.
Қазақстанда жұмыс істейтін жүкті әйелдерге МӘМС үшін жарнаны жұмыс беруші, жұмыс істемейтіндер үшін мемлекет төлейді. Бала дүниеге келген сәттен бастап 18 жасқа дейін мемлекет тарапынан сақтандырылады.
«Біздің елімізде барлық әйел сақтандырылған. Олардың әрқайсысы тегін босануға хақылы. Босандыруға кететін шығын қанша болса да МӘМС есебінен төленеді», — деп атап өтті Алматы филиалы директорв Ілияс Мұхамеджан.
Фото: pexel
