Мақтаарал ауданында тағы бес елді мекенге табиғи газ беріліп, тұрғындардың көптен күткен арманы орындалды. Аудан әкімі Бақыт Асанов ел ішіндегі осы қуанышты сәтпен бөлісу үшін Ж.Нұрлыбаев ауылдық округіне қарасты Өнімкер ауылына арнайы барды, деп хабарлайды Todayinfo ақпараттық агенттігі.
– «Бұл — үлкен қуаныш пен маңызды тарихи сәт. Табиғи газдың берілуі — елді мекендеріміздің инфрақұрылымын дамыту жолындағы үлкен қадам. Бұл тек өмір сапасын жақсартып қана қоймай, тұрғындарымыздың тұрмыстық жағдайын жеңілдетуге, әлеуметтік және экономикалық дамуға жол ашады. Мемлекет басшысының ел халқын сапалы өмір сүру мүмкіндігімен қамтамасыз етуге бағытталған тапсырмалары мен бастамалары нәтижесінде, осындай игі істер жүзеге асып отыр», – деді Бақыт Насырханұлы ауыл тұрғындарына арнаған сөзінде.
Аудан басшысы газ жүйесін жоспардан ерте іске қосуға атсалысқан «QazaqGaz Aimaq» АҚ Түркістан өңірлік филиалының директоры Ақылбек Абилдиевке алғыс білдірді. Елді мекенде өткен жиынға жиналған ауыл тұрғындары газ алауының тұтануына куә болып, ерекше ризашылықпен қабылдады. Алаудың тұтануымен бірге көпшілік қуаныштарын жасыра алмай, үлкен қошемет көрсетті.
Газ берілген елді мекендер қатарында Ж.Нұрлыбаев ауылдық округіне қарасты Ырысты, Қарақыр, Өнімкер және Жаңажол ауылдық округіне қарасты Арайлы мен Достық ауылдары бар. Осы бес елді мекенге газ жүйесінің қосылуы – ауданның газ инфрақұрылымын дамытудағы тағы бір нақты қадам болды.
Бүгінде Мақтаарал ауданындағы 68 елді мекеннің 46-сы газбен қамтылған еді. Бұл – жалпы елді мекендердің 67,6%-ы деген сөз. Енді жаңа қосылған ауылдардың есебінен бұл көрсеткіш айтарлықтай ұлғайды.
Айта кету керек, 2024 жылы облыстық және республикалық бюджеттерден жалпы 6,3 млрд теңге көлемінде қаржы бөлініп, 19 елді мекеннің ішкі газ жүйелерінің құрылысы жүргізілуде. Бұл нысандардың жалпы құны – 8,2 млрд теңге. Құрылыс жұмыстары 2025 жылға өтпелі болып жоспарланған. Сонымен қатар, әлі газ жүйесімен қамтылмаған қалған 4 елді мекенде де ішкі газ жүйесін салу үшін биыл 891 млн теңге көлемінде қаржы қарастырылған.
Аталған жұмыстар аясында бүгін бес елді мекенге табиғи газ беріліп отыр. Жалпы барлық құрылыс жұмыстары толық аяқталғаннан кейін, 2026 жылы Мақтаарал ауданы табиғи газбен 100% қамтылатын болады. Бұл – ауданның әлеуметтік-экономикалық дамуындағы маңызды кезеңдердің бірі ретінде тарихта қалмақ.
