Ұлы Жеңістің 80 жылдығы қарсаңында елімізде патриотизмді, отансүйгіштік пен тарихи жадыны жаңғыртуға бағытталған маңызды іс-шаралар жалғасуда. Соның аясында Алматы облысының әкімі Марат Сұлтанғазиев Ұлы Отан соғысының ардагерлері Тәңірберген Толғанбаев пен Фёдор Емельянович Ковалевке арнайы барып, ерліктері үшін шынайы алғыс білдірді, деп хабарлайды Todayinfo ақпараттық агенттігі.
Кездесу барысында аймақ басшысы ардагерлерге мерейтойлық медальдар мен Қонаев қаласынан жайлы жаңа пәтердің кілттерін салтанатты түрде табыс етті. Сондай-ақ, облыстағы барлық соғыс ардагерлеріне 5 миллион теңге көлеміндегі ақшалай сертификаттар берілгенін атап өтті. Бұл — ел мен жер үшін жанын қиған ардагерлерге көрсетіліп отырған мемлекеттік деңгейдегі құрмет пен қолдаудың көрінісі.
«Бүгінгі бейбіт өмір үшін жанын қиған, ерлік көрсеткен жандардың есімі ел жадында мәңгі сақталады. Сіздердің жеңіске қосқан үлестеріңіз баға жетпес. Біз әрқашан Сіздерді мақтан тұтамыз», — деді облыс әкімі.
Кездесу жылы әрі жүрекжарды әңгімемен жалғасып, ардагерлер өңір басшылығына алғыстарын білдірді. Олар бұл шараны жас ұрпаққа үлгі боларлық патриоттық тәрбие деп бағалап, мұндай ықылас жеңімпаз буынға деген құрметтің биік белгісі екенін айтты.
Жеңістің 80 жылдығын атап өту — тек өткенді еске алу емес, сонымен бірге елдің бірлігін, патриоттық рухын, бейбітшілік пен тұрақтылықтың қадірін ұғындыруға бағытталған тағылымы мол тарихи кезең болып отыр.
