Фото: истоки
Қазақстанда медициналық қызметтердің құны қаншалықты өсуі мүмкін екені туралы Денсаулық сақтау министрі Ақмарал Әлназарова Үкімет үйінде өткен баспасөз мәслихатында түсініктеме берді. Оның айтуынша, жаңа Салық кодексі аясында МӘМС және ТМККК пакеттері аясында көрсетілетін барлық медициналық қызметтер ҚҚС-тан (Қосылған құн салығы) толық босатылады, деп хабарлайды Todayinfo ақпараттық агенттігі.
«Бұл – біз іске асырған алғашқы қадам. Екінші – бұл қызметтердің құнын кезең-кезеңімен 5-тен 10 пайызға дейін көтеру. Бұл процесс екі жыл ішінде жүзеге асады. Үшіншіден, ҚҚС-тан өмірлік маңызы бар дәрі-дәрмектер де босатылады. Бұл дәрілердің көтерме және бөлшек сауда тізімі уәкілетті органмен анықталады. Қазір осы тізімді жасап жатырмыз», – деді министр Ақмарал Әлназарова.
Министрдің айтуынша, нақты есептеулер жүргізілген және олардың нәтижесі бойынша:
«ҚҚС енгізілген жағдайда тиімді салық салу мөлшерлемесі шамамен 2-3 пайыз болады. Сол себепті медициналық қызметтер бағасының өсуі – 5%-ға дейінгі шекте болады», – деп нақтылады министр.
