Фото: Ашық дереккөзден
Антикор еңбек және халықты әлеуметтік қорғау министрлігінің қызметіндегі сыбайлас жемқорлық тәуекелдеріне сыртқы талдау жүргізіп, нәтижесін жариялады, деп хабарлайды Тodayinfo ақпараттық порталы.
Министрлікке қанша қаражат бөлінген
Кейінгі бес жылда әлеуметтік қорғау шараларына бюджеттен 23 трлн теңге бөлінген. Алдағы 2 жылға тағы 13 трлн теңге жоспарланған. Негізгі сыбайлас жемқорлық тәуекелдері мүгедектікті белгілеу, жұмыспен қамтуға жәрдемдесу және әлеуметтік төлемдер мен қызметтерге бюджет қаражатын игеру мәселелерінде анықталған. Олар әсіресе әлеуметтік көмекке жүгінетін азаматтардың осал санаттарына әсер етеді. Жосықсыз қызметкерлер қолданыстағы олқылықтарды парақорлық пен қызметтік өкілеттігін асыра пайдалану үшін жиі қолданады.
Жоғарыда айтылғандар қылмыстық құқықтық тәжірибемен де расталады. Мысалы, Шымкентте еңбек және әлеуметтік қорғау департаментінің бөлім басшысы мен қалалық емхана қызметкеріне қатысты үкім шығарылды, олар мүгедек балалардың ата-аналарынан мүгедектік тобын белгілегені үшін жүйелі түрде пара алып отырған. Сыбайлас жемқорлық тәуекелдеріне сыртқы талдау барысында шешуді қажет ететін бірқатар негізгі мәселелер анықталды. Агенттікпен медициналық-әлеуметтік сараптамаға қатысты 5,2 мыңнан астам айла-шарғы жасаудың фактісі анықталды, онда мамандар негізсіз мүгедектік тағайындаған немесе одан бас тартқан. Мүгедектігі бар адамдарға арналған тауарлар мен қызметтердің бағасын негізсіз көтеру, сондай-ақ жалған жеткізілімдер фактілері тіркелді, бұл 830 миллион теңгенің мақсатсыз жұмсалуына әкелді. Атап айтқанда, Шымкент қаласында гигиеналық құралдарға негізсіз төленген сома 200 миллион теңгені құрады. 1,2 мыңнан астам жалған бизнес құру және әлеуметтік төлемдерді алу үшін кірістерді көбейту жағдайлары анықталды, – делінген антикор хабарламасында.
Қағаз жүзіндегі көмек
Сонымен қатар жалған жұмыспен қамтудың 500-ден астам жағдайы анықтаған. 168 млн теңге көлемінде мемлекеттік субсидиялар қағаз жүзінде бөлінген, бірақ адамдар іс жүзінде жұмысқа орналаспаған.
Талдау қорытындысы бойынша медициналық-әлеуметтік сараптама процестерін автоматтандыруға және жұмыспен қамтуды қамтамасыз етуге бағытталған бірқатар ұсынымдар әзірленген. Мемлекеттік органдардың дерекқорларымен интеграциялау және тәуекелдерді басқару жүйесін енгізу арқылы бақылау тетіктерін күшейту ұсынылған.
