Қазақстанда жұмыссыздық деңгейі соңғы жылдары салыстырмалы түрде тұрақты қалпында қалып отыр. Ұлттық статистика бюросының мәліметі бойынша, 2024 жылдың соңында елдегі жұмыссыздық үлесі 4,6 пайыз болды. Жалпы 9,7 миллион адам жұмыс күшін құраса, олардың 9,28 миллионы жұмыспен қамтылған. Еңбек министрлігі мұны мемлекет жүргізіп отырған белсенді еңбек саясаты мен еңбек саласын цифрландырудың нәтижесі деп бағалады, деп жазады Todayinfo ақпараттық агенттігі.
Мемлекеттік қызметтердің көп бөлігі электрондық форматқа көшіріліп, Enbek.kz платформасы арқылы 400 мыңнан астам адам жұмысқа орналасқан. Сонымен қатар, «Жұмыспен қамту жол картасы», «Жастар практикасы», «Бастау Бизнес» және «Күміс жас» бағдарламалары тұрақты жүзеге асуда.
Мәселен, Түркістан облысы еңбек нарығын дамытуда белсенді өңірлердің бірі. Мұнда 2025 жылы «Өңірлік жұмыспен қамту картасы» шеңберінде облыста 130 769 жаңа жұмыс орны ашу жоспарланған, оның ішінде 83 554 тұрақты, 47 215 уақытша орындар бар. Жұмыссыздық деңгейі 4,7% тіркелген. Аз қамтылған азаматтарды жұмыспен қамту шаралары нәтижесінде АӘК алу көрсеткіші 22%-ға төмендеген.
Жастар мен егде буын да осы бағдарламалардың пайдасын көріп отыр. «Жастар практикасы» арқылы 2025 жылы 11 052 жас маманды жұмысқа орналастыру көзделген. Қазірдің өзінде 8 880 адам өз мамандығына сәйкес жұмыс істеп жатыр. Бағдарламаны аяқтаған 832 азаматтың 468-і тұрақты жұмыспен қамтылған. «Күміс жас» жобасы бойынша жоспарланған 2 760 адамның 2 375-і қатысып, 33 адам тұрақты жұмысқа орналасқан.
«Жұмыссыздықты азайту тек жұмыс орнын ашумен шектелмейді. Маңыздысы — азаматты тұрақты табыс көзімен қамтамасыз ету. Түркістандағы гранттық және жастар бағдарламалары еңбек нарығында құрылымдық өзгерістер туғызып отыр және өңір экономикасының орнықты дамуына ықпал етеді», — дейді сарапшы Әлімхан Жамалбеков.
Кәсіпкерлікті дамыту да өңірдегі жұмыссыздықты азайтуда маңызды рөл атқарады. 2025 жылы 1 793 азаматқа қайтарымсыз грант беру жоспарланған, қазіргі таңда 1 788 адам грантқа ие болған. Грант көлемі — 400 АЕК немесе шамамен 1,57 миллион теңге. Қаражат кондитерлік, шаштараз, дәнекерлеу, мал шаруашылығы, ара өсіру, қолөнер және косметика өндірісіне жұмсалып, жаңа кәсіптер ашылды. Кейбір грант иегерлері басқа жұмыссыз азаматтарды тұрақты жұмыспен қамтып отыр. Ауылдық жерлерде кәсіпкерлік белсенділігі артқан.
Фото:
