Мемлекеттік қызмет істері агенттігі төрағасының орынбасары Салауат Мүксімов мемлекеттік қызметшілердің жемқорлыққа барғаны үшін жоғары басшылардың отставкаға кету ретін тағы бір түсіндірді.
«Бізде сыбайлас жемқорлық ісі бойынша жауапкершілік институты бар. Жемқорлық фактісі болса оны мемлекеттік қызметтің түріне байланысты ажырату керек. Егер мәселе мемлекеттік қызметшілердің, яғни әкімшілік лауазымдағы басшылардың жауапкершілігіне қатысты болса, онда құқықтық жауапкершілік қарастырылған. Бұл жерде екі термин бар. Біріншіден, сот үкімінің заңды күшіне енуі, екіншіден, басшының өзі сыбайлас жемқорлыққа қарсы іс-қимыл шараларын қабылдамау мен болған қылмыстық іс – әрекет арасындағы себеп-салдарлық байланыс. Сонымен қатар, саяси қызметшілердің де жауапкершілігі де бар. Бұл жерде құқықтық нормамен қатар, саяси жауапкершілікте бар», — деді Салауат Мүксімов ОКҚ-де өткен брифингіде.
Оның айтуынша, саяси қызметші жемқорлық жасап, оған сот үкімі шыққан кезде басшы отставкаға кетеді.
«Егер әкімшілік құрылымның (басқарма, департамент тағы басқа) басшысының жемқорлық әрекеті туралы айтатын болсақ, онда жетекшілік ететін әкім орынбасарына жауапкершілігі қарастырылады. Алдымен істің мән-жайын зерттеу қажет, өйткені отставкаға кетудің белгілі бір шарттары бар. Әр жағдайды жеке қарау маңызды», — дейді ол.
