Фото: instagram.com/aidyn_nury
Айтыскер ақын әрі коуч Айнұр Тұрсынбаеваның күйеуі, «Нойс» лақап атымен танымал Нұржан Иманәлиев әлеуметтік желідегі жазбасымен жұртты алаңдатты. Ол өзіне тағылған айыптарға қатысты үн қатып, қоғамға ашық мәлімдеме жасады,деп хабарлайды Todayinfo ақпараттық агенттігі.
Нұржан Иманәлиев жазбасында тағдыр, әділет, ар-ождан және қоғамдық пікірдің қысымы жайлы ой қозғады. Ол адамды тек бір хаттаманың негізінде кінәлау дұрыс емес екенін айтты.
«Бір адамды айыптау – оңай. Бірақ адамның тағдыры – бір парақ хаттамадан тұрмайды. Оның жүрегі бар. Оның артында тәрбие, өмір жолы, еліне деген сүйіспеншілігі бар», – деді ол.
Нойс өздерін ел тонамаған, ешкімнің көз жасына қалмаған, дұға тілейтін, елдің тыныштығын қалайтын азамат ретінде сипаттады.
Жазбасында Нұржан Иманәлиев жастық шағында жіберген қателіктерін жоққа шығармайтынын ашық айтты. Бірақ ол өмірден сабақ алып, түзелуге, қоғамға пайдалы болуға тырысқанын жеткізді.
«Біз ешқашан мемлекетке, үкіметке немесе ел басшылығына қарсы шыққан емеспіз. Қайта, заң алдында міндетіміз болса – жауап бердік», – дейді ол.
Сонымен қатар, ол қазіргі уақытта өзіне дәлелсіз айыптар тағылып, қудалауға ұшырап жатқанын да жасырмады.
Иманәлиев өз жазбасында елге адал екенін баса айтты:
«Мен ешкімді сатқан жоқпын. Ешқайда қашқан жоқпын. Мен – туған жерін, елін, халқын шын жүрегімен сүйетін қарапайым қазақпын», – деді ол.
Сөз соңында ол ақиқатты айтудың өзі қылмысқа айналғанын атап өтті, дегенмен ар-ожданы мен ниетінің таза екенін айтып, Алланың әділдігіне сенім білдірді:
«Ақиқатты айту – қылмысқа айналған заман. Бірақ мен білемін: Алла – Әділ. Ол жүректерді көреді. Ниетті біледі. Менің ар-ожданым да, ниетім де – Оның алдында таза. Бұл маған жеткілікті», – деп түйіндеді жазбасын.
