Блогер Рүстем Жүгінісов Ақтөбе мешітінде болған шулы оқиғаға байланысты сөзі үшін кешірім сұрады, деп хабарлайды Todayinfo.
«Соңғы күндері тарап жатқан менің жазбаларыма байланысты түсініктеме бергім келеді. Бірінші сторисымда айтқанымдай, бұл жағдайда толықтай ер азаматтың жасағаны қате. Бұл-айқын. Дінімізде де «бір күндік неке» деген түсінік жоқ екенін нақты тағы айтқым келеді.
Ал, екінші сториста, өкінішке қарай, өз ойымды дұрыс жеткізе алмадым. Ойлана келе, сол сәттегі эмоцияның әсерімен кей сөздерімде қаттылыққа жол беріп, ойымды дұрыс жеткізе алмағанымды түсіндім. Бұл менің тарапымнан кеткен үлкен қателік екенін мойындаймын»,- деді ол.
Жүгінісов мешіттегі былықты жайып салған қызды кінәлеу ойында болмағанын айтады.
«Бұл мәселені қозғағанда, ең алдымен қауіпсіздік жағын ойлаған едім. Ия, мен де қыз бағып отырған әкемін. Мен де қыздарымды уайымдаймын. Кеш бата көшеде түрлі қауіп төндіретін ер азаматтар, яғни мас күйдегі адамдар, есірткі әсеріндегі немесе психикалық жағдайы тұрақсыз азаматтар кездесуі мүмкін. Мен тек сол қауіптерден қорғаштап, қарындастарымды уайымдағандықтан, эмоциямен айтып қойдым. Ия, жеткізу формасынан қателік кеткені рас. Бірақ, менің ниетім ешқашан ару жандарды кінәлау болмаған», — деп жазды желі белсендісі.
Ол қыз-келіншектерді әрқашан қолдайтынын атап өтті.
«Ең алдымен, өзгеріс те, жауапкершілік те ер азаматтардан басталуы қажет. Бұл жағдай мен үшін үлкен сабақ болды. Айтылған әр пікірді қабылдап жатырмын. Қарындастарым, әпкелерім сіздерді ренжітіп алсам, шын жүректен кешірім сұраймын!», — деді Рүстем Жүгінісов.
Еске салайық, Эмануелла Наурызбаева есімді бойжеткен өзіне «Нұр ғасыр» мешітінде бейтаныс ер адамның «бір реттік неке» ұсынғанын айтып, видео жариялаған. Оған біраз азаматтар пікір білдіріп, оның ішінде қыздың өзін кінәлаған. Рүстем Жүгінісов Эмануелланы «бай іздеп барды» деп айыптаған болатын.
Фото: скрин/ @zhugunussov
