Журналист Тоқтар Жақаш Түркияға жасаған сапарынан алған әсерімен Facebook парақшасында бөлісіп, ел ішінде туристерге жасалатын алаяқтық әрекеттерді сынға алды,деп хабарлайды Todayinfo ақпараттық агенттігі.
Ол Иерополис пен Памуккале тәрізді ежелгі өркениеттің ордасы саналатын мекендерге сапар шеккенімен, турист ретінде көрген қиындықтары мен шығындарының тым шектен шыққанын жазды.
Жазбаның негізгі мазмұны Түркиядағы такси қызметінің әділетсіздігі мен туристерге арналған шектен тыс баға саясаттарына арналды. Мәселен, әуежайдан қонақүйге дейін 34 мың теңге алған таксист пен 905 лирге (шамамен 27 мың теңге) тең келетін қысқа жолға кеткен шығын туралы айтылады. Сонымен қатар, Памуккале мен Иерополиске бару үшін алдын ала келісілген 150 доллардың орнына, сапар соңында 250 доллар талап етілгені де сөз болды.
«Алданатынымды біліп тұрып, алты рет нақтылап сұрадым. Сонда да қашып құтылмадым», — деп жазады автор.
Тоқтар Жақаш Түркиядағы кафелер мен базарлардағы бағаның тұрақсыздығын, тағамдардың дәмсіз әрі бірсарынды екенін де атап өткен. Түрік асханасы дәм мен алуан түрлілік жағынан қазақтың ұлттық тағамдарымен салыстыруға келмейтінін айтты.
Автор Түркияның мұсылман елдеріне тән сыртқы келбеті бар болғанымен, іс жүзінде материалистік әрі туристі тек пайда көзі ретінде қарайтынын сынады. «Мұсылманша киінген кәпірден» басқа ештеңе көрмегенін ашық айтып, бұл елдегі темекі тартатын орамалды әйелдер мен жайнаған коммерциялық мәдениетті де атап өтті.
Соған қарамастан, Тоқтар Жақаш Түркияға сапар шегудің тарих пен сәулет өнері тұрғысынан берері мол екенін атап өтті. Иерополистегі Аполлон ғибадатханасы мен 2200 жылдық амфитеатрлар — көрген жанға ұмытылмас әсер сыйлайтынын жазды.
«2–2,5 мың жыл бұрын 15-20 метр биік ғимараттарды тастардан қалай салған деп ойланасың», — дейді ол.
