Фото: Мәжіліс
Мәжіліс депутаты Нартай Аралбайұлы таксистердің тағдырына қатысты заң тоқтатылғанын айтты, деп хабарлайды Тodayinfo ақпараттық порталы.
Депутат таксистердің тағдырымен ойнайтын заң тоқтатылғанын мәлімдеді.
Сонымен қатар ІІМ депутаттардың көлігі 5 минут оталып тұрған адамдарды жазалау туралы шешімді қайта қарау туралы ұсынысын мақұлдаған. Депутаттың 29 қаңтарда өткен пленарлы отырыста автокөлікті 5 минуттан артық оталдырып тұруға тыйым салатын министрліктің шешімін дереу өзгерту керек деп талап қойған еді. Бүгін, 30 қаңтарда ІІМ орынбасары депутаттардың осы нормаға қатысты ұсынысын қарауға, қолдауға дайын екенін жеткізген.
Бүгін АМАНАТ партиясының фракция отырысында осындай маңызды шешімдер қабылданды. Сәрсенбіде қоғамды толғандырған екі мәселеге қатысты депутаттық сауал жолдадық. Міне оң шешім шықты. Жолаушыларды автомобильмен тасымалдау саласындағы мемлекеттің міндеттерін өзін-өзі реттеу ұйымына беру, жекеменшік СРО-ға тастай салу үлкен қателік. Осы шикі қадамды көздеген заң жобасы Мәжіліске келген еді. Біз бірден қарсы болдық, — деді Нартай Аралбайұлы.
Ол депутаттар не себепті қарсы шыққанын түсіндірді.
Заң жобасы өзін-өзі реттеу ұйымдарына жолаушылар тасымалындағы тарифті белгілеу, бағаны реттеу құзыреттерін бермек. Бұл қате. Құрылуы мүмкін өзін-өзі реттеу ұйымдары азаматтарымызды аямайтыны екібастан белгілі. Бұл жерде тұтас саланы жекеменшік ұжымдарға жығып беру – монополияны қолдан жасауға бағытталған қисынсыз әрекет. Жолаушыларды автомобильмен тасымалдау саласындағы қауіпсіздік мәселелерін өзін-өзі реттеу ұйымына беру адамдардың өміріне жүрдім-бардым қараудың нақты көрінісі. Ақшаның артынан қуған жекеменшік ұйымдар қауіпсіздікке қалай болса солай қарайтыны айтпаса да түсінікті. Біздің елде де жол апаттары жыл сайын жүздеген адамның өмірін жалмайды, бұл проблеманы мемлекеттік органдар шеше алмай отырып, ақыр аяғында жолдағы қауіпсіздікті өзін-өзі реттеу ұйымына бере салу туралы шешімдері ақылды адамның әрекеті емес, — деп жазды мәжілісмен.
Депутаттың сөзінше мынадай шешім шыққан: заң жобасы Мәжілістің мұрағатына түсті. Таксистерді өзін-өзі реттеу ұйымына кіруге, жарна төлеуге міндеттейтін заң жобасы тоқтатылды.
Нартай Аралбайұлы депутаттар таксистерге қатысты өзгеріс әзірлеп жатқанын айтқан болатын.
Сонымен қатар Үкіметке көлікті 5 минут қыздыруға қатысты сауал жолдаған еді.
Естеріңізде болса, Нартай Аралбайұлы былтыр 21 қазанда Қазақстанда жүрген легионерлерге, шетелдік спортшыларға бюджеттің ақшасы бөлінбейтінін айтып, сүйінші сұраған болатын. 29 қаңтарда Мәжіліс осы мәселеге қатысты заң жобасын екінші оқылымда қабылдады.
Ақпарат көзі: BAQ.KZ
