Фото: istockphoto.com
Санкт-Петербургте ата-анасы шөп қайнатпаларымен ғана емдеген бала қайтыс болды. SHOT арнасының мәліметінше, ата-анасы оны ешқашан дәрігерге апармаған, деп хабарлайды Тodayinfo ақпараттық порталы.
Оқиға қалай өрбіді?
Кеше кешкісін бала кенеттен өзін нашар сезініп, тынысы тарылып, есінен тана бастады. Осы кезде ата-анасы – Сергей мен Валентина жедел жәрдем шақырды. Алайда дәрігерлер келгенде, баланың көз жұмғанын анықтады.
Кейіннен белгілі болғандай, ата-анасы халық медицинасына сенген. Баланың әкесі дәрігерлер мен дәрі-дәрмектерге күмәнмен қараған, себебі анасы бұрын қатерлі ісікке шалдығып, емделгеніне қарамастан қайтыс болған.
Бала бір ай бойы кеуде тұсындағы ауырсыну мен ұстамалардан зардап шеккен, бірақ оған дәрі-дәрмек берілмеген. Оның орнына, ата-анасы жалбыз, қалақай, зире және басқа да өсімдіктердің қайнатпаларын қолданған. Өкінішке қарай, бұл ем бала өмірін сақтап қала алмады.
