Қазақстанның Тұңғыш Президенті Нұрсұлтан Назарбаевтың Мәскеуге сапарына қатысты БАҚ тарапынан түскен сауалдарға байланысты оның баспасөз хатшысы Айдос Үкібай ресми түсіндірме берді,деп хабарлайды Todayinfo ақпарат порталы.
«Нұрсұлтан Назарбаевтың Мәскеуге сапары жеке, бейресми сипатта өтті. Оны Ресей Президенті Владимир Путинмен көпжылдық достық қатынастар байланыстырады. Бұл байланыс бұрынғы мемлекеттік лауазымнан тәуелсіз түрде сақталып отыр», – деді Үкібай.
Үкібайдың айтуынша, Нұрсұлтан Назарбаев телефон арқылы сөйлесулер, жеке хат алмасулар және кездесулер арқылы әлемнің бірқатар елдерінің көшбасшыларымен байланыс ұстап келеді.
«Бұл байланыстар тек Ресеймен ғана емес, сонымен қатар Түркия, Қытай, Біріккен Араб Әмірліктері, Өзбекстан, Беларусь және басқа да мемлекеттермен орнаған», – деді баспасөз хатшысы.
Мұндай бейресми форматтағы өзара әрекеттестік халықаралық тәжірибеге сай және Нұрсұлтан Назарбаевтың көпжылдық мемлекеттік қызметі кезінде қалыптасқан жеке қарым-қатынастарды көрсетеді.
Үкібай Нұрсұлтан Назарбаевтың Ресей Президентімен кездесуі дипломатиялық тәжірибеге қайшы келмейтінін атап өтті. Оның айтуынша, дәл сол күні Владимир Путин Жапонияның бұрынғы Премьер-министрі Синдзо Абэнің жесірі – Акиэ Абэмен де жеке кездесу өткізген.
«Бұл – мемлекеттік қызметтегі лауазымы жоқ, бірақ беделі бар саясаткерлермен жеке кездесулердің халықаралық нормаларға сәйкес екенін көрсетеді», – деді Үкібай.
Тұңғыш Президент Жеңістің 80 жылдығына арналған іс-шараларға шақырылғанымен, объективті себептерге байланысты ресми мерекелік күндері Мәскеуге бара алмаған. Сондықтан сапар кейінірек және жеке тәртіпте жүзеге асқан.
Соңында баспасөз хатшысы Нұрсұлтан Назарбаевтың Қазақстанда тұрақты тұратынын ерекше атап өтті.
«Оның елден кеткені туралы тарап жатқан ақпарат шындыққа сәйкес келмейді», – деді Айдос Үкібай.
